سوال: کیا فرماتے ہیں مفتیان کرام اس مسئلہ کے بارے میں کہ ہمارے گاؤں میں پرانے زمانے میں ایک قوم کے مشران نے مشترکہ طور پر کھیتوں کے ایک طرف میں تقریبا ایک مرلہ جگہ نماز کیلئے مختص کی اور بعد میں اس پر مسجد کی شکل میں پکی آبادی بھی کرلی، لیکن یہ معلوم نہیں کہ مشران نے اس جگہ کو وقف کیا تھا یا نہیں؟ اب بھی وہ مسجد کئی عشروں سے ویران ہے اور اس کی آبادی گری پڑی ہے، ہاں بعض بزرگوں سے معلوم کیا تو انہوں نے کہا کہ اس مسجد کا کوئی مستقل امام نہیں تھا اور نہ ہی اس میں مستقل طور پر اذان واقامت ہوئی ہیں، البتہ بعض اوقات کچھ لوگ نماز کے وقت جمع ہوتے تو کسی ایک شخص کو امامت کیلئے آگے کرتے، لہذا پوچھنا یہ تھا کہ کیا ایسی جگہ کو مسجد کے علاوہ کسی اور نیک مقصد کیلئے جیسے مدرسہ یا دینی کتب کی لائبریری کیلئے استعمال کر سکتے ہیں یا نہیں؟

جواب: واضح رہے کہ جو جگہ ایک مرتبہ مسجدِ شرعی بن جائے، وہ قیامت تک مسجد رہتی ہے، جب تک وہ جگہ بالکل ویران نہ ہوجائے، اسے منتقل کرنا جائز نہیں ہوتا اور نہ ہی کسی کو اس کی حیثیت تبدیل کرنے کا اختیار ہوتا ہے اور ویران مسجد کو منتقل کرنے کا مطلب یہ ہے کہ اس کا ملبہ اور اس کا سامان دوسری جگہ منتقل کیا جاسکتا ہے، لیکن اس جگہ کی حیثیت تا قیامت مسجد کی ہی رہے گی، لہذا پوچھی گئی صورت میں مسجد اگرچہ ویران ہے، لیکن اس جگہ کی حیثیت مسجد کی ہی رہے گی، اس کو تبدیل کرکے مدرسہ یا لائبریری بنانے کی اجازت نہیں ہے۔