سوال: ایک خاتون کے پاس پانچ تولہ سونا ہے، سونے کے علاوہ اس خاتون کے ساتھ کچھ بھی نہیں ہے، مثلاً نقدی وغیرہ...
ویسے عام رواج کے مطابق جیب خرچ کے لیے خاوند ماہانہ، ہفتہ وار یا روزانہ کچھ رقم دیتے ہیں، تاکہ بوقت ضرورت خود یا بچوں پرخاتون خرچ کرسکے، خاتون مذکورہ نقدی روپیہ سامان تجارت کچھ بھی ملکیت میں نہیں رکھتی، اب دریافت طلب امر یہ ہے کہ مذکورہ خاتون پر زکوٰۃ ہے یا نہیں؟
مذکورہ خاتون فی الحال گھر میں چھوٹے بچوں کا کچھ سامان مثلاً پاپڑ، چنے، وغیرہ بیچتی ہے، خاتون کے خاوند کا کہنا ہے کہ یہ جو کچھ بھی ہے یہ میرا ہے اور نفع ونقصان بھی میرا ہی ہے۔

جواب: واضح رہے کہ اگر کسی کی ملکیت میں ساڑھے سات تولہ سے کم سونا ہو اور نقدی، چاندی، یا سامان تجارت میں سے اس کے پاس کچھ بھی نہ ہو تو اس شخص پر زکوٰۃ واجب نہیں ہوگی۔
پوچھی گئی صورت میں چونکہ مذکورہ عورت کی ملکیت میں پانچ تولہ سونے کے علاوہ نقدی وغیرہ کچھ بھی نہیں ہے، اور خاوند کی طرف سے جو رقم اس کو ملتی ہے، وہ اس عورت کی ملکیت میں نہیں دی جاتی، بلکہ گھر کے مشترکہ خرچہ کے لیے ملتی ہے، نیز گھر میں چھوٹے بچوں کا جو سامان بیچنے کے لیے رکھا ہے، وہ بھی شوہر کا ہے، لہذا اس عورت پر زکوٰۃ واجب نہیں ہوگی۔