سوال: مفتی صاحب ! میری موبائل کی دکان ہے، بسا اوقات ایسا ہوتا ہیکہ گاہک کوئی موبائل مانگتا ہے، ہم کہتے ہیں کہ ہمارے پاس ہے اور ہم سودا بهی کرلیتے ہیں، جبکہ وہ مطلوبہ موبائل ہمارے پاس نہیں ہوتا ہے، ہم دوسری دکان سے اٹهاکر دیدیتے ہیں اور اس گاہک سے اس کی قیمت لے کر جس دکان سے موبائل اٹهایا تها، اپنا نفع رکھ کر بقیہ قیمت اس دکاندار کو دیدیتے ہیں، کیا اس طرح موبائل خرید و فروخت کرنا درست ہے؟

جواب: صورت مذکورہ میں مبیعہ(مطلوبہ موبائل) پرقابض ہونے سے پہلے ہی دوسرے کے ہاتھ فروخت کردینا بیع قبل القبض ہے اور اس قسم کی بیع سے آپ صلی اللہ علیہ وسلم نے منع فرمایا ہے، ارشاد ہے: لا تبع ما لیس عندک.
ترجمہ: یعنی ایسی چیز نہ بیچو جو تمہارے پاس نہیں ہے۔
البتہ اس کی جائز صورت یہ ہوسکتی ہے کہ دکاندار خریدار سے وعدہ بیع کرلے، یعنی دکاندار گاہک سے یہ کہے کہ میں آپ کو اتنے میں دلوا دونگا، پهر اس کے بعد کسی سے وہ مطلوبہ موبائل خرید کر قبضہ کرنے کے بعد گاہک کو فروخت کردے، اس طرح یہ سودا درست ہوجائے گا۔