سوال: ہمارے والد صاحب کا گھر ہے، جس میں ہماری رہائش ہے، ہم تین بہنیں اور ایک بھائی ہیں، جبکہ ایک بہن کا انتقال ہو چکا ہے۔ اب بہنیں اپنے حصے کا تقاضا کر رہی ہیں۔ والد صاحب نے یہ گھر ڈھائی ہزار کا لیا تھا، چھت اس کی سیمنٹ اور ٹین کی بنی تھی، میں نے شادی کے بعد 2004ء میں اس پر ساڑھے تیرہ لاکھ روپے لگائے، اس وقت مکان کی قیمت ساڑھے تین لاکھ تھی اور اب تقریباً اس کی قیمت دو کروڑ ہے۔ اب میں فالج کا مریض ہوں، آٹھ سال سے بستر پر ہوں، میرے چار بچے ہیں، دو بڑی بیٹیاں اور ان سے چھوٹے دو بیٹے ہیں، بڑا لڑکا 19 سال کا ہے جو پڑھ رہا ہے، کماتا نہیں ہے۔
میری نیت ان کو حصہ دینے کی ہے، میں نے والد صاحب کو بھی کہا تھا کہ میں حصہ دوں گا اور دینا بھی چاہتا ہوں، لیکن ابھی حالت ایسی ہے کہ دے نہیں سکتا، کیونکہ میرا گزر بسر گھر کے کرایے سے چلتا ہے، اگر گھر بیچ دیا تو مشکل ہوجائے گی، جبکہ بہنیں مطالبہ کر رہی ہیں کہ آپ اپنی زندگی ہی میں ہمارا حصہ دے دیں، موت و حیات کا کچھ پتہ نہیں۔
۱) معلوم یہ کرنا ہے کہ میں نے مکان کی تعمیر میں جو پیسے لگائے ہیں، وہ مجھے ملیں گے؟
۲) جس بہن کا انتقال ہوا ہے، اس کی کوئی اولاد نہیں ہے، کیا اس کا حصہ بنے گا؟
۳) والدہ نے گھر بنتے وقت بہنوں سے کہا تھا کہ یہ گھر تمہارا بھائی بنا رہا ہے، اب تقسیم کے وقت اُس وقت کی قیمت کا اعتبار ہوگا یا ابھی کی قیمت کا اعتبار ہوگا؟

جواب: ۱۔ الف) پوچھی گئی صورت میں اگر آپ نے والد صاحب کے مکان میں ان کی اجازت سے اپنے لیے تعمیرات کروائی تھی یا والد صاحب کے انتقال کے بعد تمام ورثاء کی اجازت سے اپنے لیے تعمیرات کروائی تھی تو اس صورت میں آپ نے جتنی رقم اور اخراجات مکان کی تعمیرات میں کیے تھے، وہ آپ کو ملیں گے۔
ب) اور اگر آپ نے تمام ورثاء کی اجازت لیے بغیر سب کے لیے یہ تعمیرات کروائی تھی تو اس صورت میں تعمیر میں لگائی گئی یہ رقم اور اخراجات آپ کی طرف سے تبرع و احسان ہوں گے اور آپ کو تعمیرات پر لگائی ہوئی رقم اور اخراجات نہیں ملیں گے۔
ج) اگر یہ تعمیرات ورثاء کی اجازت کے بغیر آپ نے اپنے لیے کی تھی تو آپ کو اپنی تعمیر کردہ عمارت کے بدلہ میں صرف اس عمارت کے ملبے کی قیمت ملے گی۔
۲) اگر آپ کی بہن کا والد صاحب کے انتقال کے بعد انتقال ہوا ہے تو ان کو اپنے والد کی میراث میں حصہ ملے گا جو ان کے انتقال کے بعد ان کے ورثاء میں ان کے شرعی حصوں کے مطابق تقسیم ہوگا، اور اگر والد صاحب سے پہلے انتقال ہوا ہے تو والد مرحوم کی میراث میں ان کا کچھ حصہ نہیں ہوگا۔
۳) واضح رہے کہ اگر میراث کئی سالوں بعد تقسیم ہو رہی ہو تو اس میں چیزوں کی قیمت کا تعین موجودہ قیمتوں کے اعتبار سے کیا جائے گا، لہذا تقسیم کے وقت گھر کی موجودہ قیمت لگائی جائے گی۔
شریعت میں دوسروں کے حقوق کی ادائیگی میں جلدی کا حکم دیا گیا ہے، چونکہ میراث میں بہت سے لوگوں کے حقوق متعلق ہوجاتے ہیں، اس لیے بغیر کسی عذر کے میراث تقسیم کرنے میں تاخیر کرنا درست نہیں ہے، کیونکہ بسا اوقات میراث بروقت تقسیم نہ کرنے پر مستقبل میں بہت سے مسائل جنم لے لیتے ہیں، مثلا: آپس میں بدگمان ہوجانا، وقت اور حالات کے ساتھ نیتوں کا بدل جانا، قریبی رشتہ داروں مثلاً بہن بھائیوں کا آپس میں قطع تعلقی پیدا ہوجانا وغیرہ۔
لہذا پوچھی گئی صورت میں خاص طور پر جب بہنیں میراث کی تقسیم کا مطالبہ بھی کررہی ہیں تو بھائی کو چاہیے کہ جتنی جلدی ہو سکے والد کی میراث کو ان کے شرعی ورثاء میں شریعت کے میراث کے قانون کے مطابق تقسیم کردے۔