سوال: احادیث کی روشنی میں اس بات کی وضاحت فرمائیں کہ حضرت نوح علیہ السلام کی کل عمر کتنی تھی اور اپنی امت کو کتنے عرصہ تک تبلیغ کرتے رہے؟

جواب: حضرت نوح علیہ السلام کی عمر سے متعلق مفسرین کرام کے مختلف اقوال ہیں، چونکہ قرآن وحدیث میں حضرت نوح علیہ السلام کی عمرکے بارے میں کوئی واضح بات نہیں ہے، اس لیے ان اقوال میں سے کسی بھی قول کو یقینی نہیں کہا جاسکتا ہے۔
ذیل میں اس حوالے سے اقوال ذکرکیے جاتے ہیں:
۱۔تفسیر ابن ابی حاتم (3041/9)میں ہے کہ امام قتادہ فرماتے ہیں:حضرت نوح (علیہ السلام) کی عمر ساڑھے نو سو سال تھی۔ تین سو سال اپنی قوم کو اللہ کی طرف دعوت دینے سے پہلے کے ہیں اور تین سو سال تک اپنی قوم کو اللہ کی طرف بلایا اور ساڑے تین سو سال طوفان کے بعد زندہ رہے۔
علامہ ابن کثیر نے اس قول کو ’’غریب‘‘ قرار دیا ہے۔
۲۔ كعب احبار كے نزديك حضرت نوح علیہ السلام کی عمر ایک ہزار بيس سال تھی۔
امام ابن ابی حاتم نے عطاء بن یسار کے حوالے سے کعب احبار کا قول نقل کیا ہے کہ حضرت نوح علیہ السلام اپنی قوم میں ساڑھے نو سال تک رہے اور اس کے (طوفان کے بعد) ستر سال زندہ رہے۔
۳۔عون بن شداد کاقول ہے کہ سولہ سو پچاس سال تھی۔
عون بن شداد فرماتے ہیں کہ جب اللہ تعالیٰ نے حضرت نوح علیہ السلام کو ان کی قوم کی طرف نبی بناکر بھیجا تو ان کی عمر ساڑھے تین سو سال تھی، چنانچہ انہوں نے اپنی قوم کو ساڑھے نو سو سال تک اللہ کی طرف بلایا اور (طوفان ) کے بعد ساڑھے تین سوسال زندہ رہے۔
علامہ ابن کثیر نے اس قول کو بھی ’’غریب‘‘قرار دیا ہے۔
۴۔حضرت ابن عباس رضی اللہ عنہما کاقول ہے کہ حضرت نوح علیہ السلام کی عمر ایک ہزار پچاس سال تھی۔
امام ثعلبی نےحضرت ابن عباس رضی اللہ عنہما کا قول نقل کیا ہے کہ حضرت نوح (علیہ السلام) کو چالیس سال کی عمر میں مبعوث کیا گیا اور وہ اپنی قوم میں ساڑھے نو سو سال رہ کر لوگوں کو اللہ تعالی کی طرف بلاتے رہے اور طوفان کے بعد بھی ساٹھ سال زندہ رہے، یہاں تک کہ لوگ زیادہ ہوگئے اور پھیل گئے۔
علامہ سیوطی رحمہ اللہ نے ’’الدرالمنثور‘‘میں اس قول کو امام ابن ابی شیبہ ،عبد بن حمید ،ابن المنذر ،ابن ابی حاتم ،ابوالشیخ اورامام حاکم کے حوالے سے نقل کیا ہے۔
علامہ ابن کثیر نے اس قول کو اقرب قرار دیا ہے۔
۵۔حضرت ابن عباس رضی اللہ عنہما سے ایک قول یہ بھی مروی ہے : آپ کو جب معبوث کیا گیا تو آپ کی عمر اڑھائی سو سال تھی اور آپ اپنی قوم میں نو سو پچاس سال تک رہے اور طوفان کے بعد دوسو سال تک رہے۔
۶۔وہب بن منبہ کا قول ہے کہ حضرت نوح علیہ السلام کی عمر چودہ سوسال تھی۔
۷۔حضرت عکرمہ رضی اللہ عنہ کا قول ہے کہ حضرت نوح علیہ السلام کی عمر سترہ سو سال تھی۔
علامہ سیوطی نے’’الدرالمنثور‘‘میں امام عبد بن حمید کے حوالے سے نقل کیا ہے کہ حضرت عکرمہ رضی اللہ عنہ فرماتے ہیں کہ حضرت نوح علیہ السلام کی بعثت سے پہلے اور بعد میں کل عمر سترہ سو سال تھی۔
علامہ ابن کثیر رحمہ اللہ نے مختلف اقوال ذکر کرنے کے بعد حضرت ابن عباس رضی اللہ عنہما سے مروی قول "حضرت نوح علیہ السلام کی عمر ایک ہزار پچاس سال تھی" کو راجح قرار دیا ہے۔