سوال: مفتی صاحب! میرا سوال یہ ہے کہ ایسے حضرات جو کمزور ہوں اور اپنی بیوی کے پاس جانے کے قابل نہ ہوں، ان کے لیے جو نسخہ ہم تیار کرتے ہیں، اس میں ہم برابر وزن میں بارہ چیزیں استعمال کرتے ہیں، ان میں سے ایک جند پلستر(لدھڑ کا خصیا) بھی ہے، جس کے بغیر نسخہ مکمل کام نہیں کرتا تو کیا یہ جائز ہے؟ اور اگر اس کی مقدار ڈبل کردیں تو اس کا رزلٹ زیادہ بہتر ہو جاتا ہے۔ برائے مہربانی رہنمائی فرمادیں۔

جواب: واضح رہے کہ حشرات الارض کے اجزاء کو علاج کے لیے کھانے والی غذا یا دوا میں استعمال کرنا شرعاً ناجائز ہے، البتہ اگر اُس مرض کا علاج کسی بھی طب میں کسی جائز چیز سے ممکن نہ ہو اور کوئی پرہیز گار مسلمان ماہر طبیب اس بیماری کے علاج میں حشرات الارض کے اجزاء کو تجویز کرے تو ایسی مجبوری کی صورت میں حشرات الارض کے اجزاء سے علاج کرنے کی گنجائش ہے۔
پوچھی گئی صورت میں قوت باہ کی بحالی کے لیے عام حالات کے اندر "جند بدستر" کے بعض اجزاء کا بطورِ دوا خوردنی استعمال شرعاً ناجائز ہے، نیز فن طب کے ماہر تجربہ کار مسلمان اطباء کرام سے اس بارے میں تحقیق کی گئی تو ان کی رائے بھی یہ تھی کہ حلال اجزاء سے قوت باہ کا علاج ممکن ہے، لہذا حلال کے ہوتے ہوئے حرام اجزاء سے علاج کرنا جائز نہیں ہے۔
ہاں! اگر کسی بھی طب میں اس مرض کا علاج حلال اشیاء سے ممکن نہ ہو یا حلال اجزاء سے علاج یقینی نہ ہو اور فن طب کے دیانت دار ماہر طبیب اس کو نسخے میں تجویز کر دیں تو اس کے استعمال کی گنجائش ہے۔
لہذا اس بیماری کے علاج میں دیگر ماہرین طب سے رجوع کر کے ان کی تجویز کے مطابق حلال اشیاء سے علاج کو اختیار کرنا چاہیے۔
اگر حلال اجزاء استعمال کے باوجود افاقہ نہ ہو اور مسلمان دیانت دار ماہر اطباء بیماری کی نوعیت کے پیش نظر "جند بدستر" کے اجزاء کو ہی بطورِ علاج تجویز کریں، تو پھر اس کی بقدر ضرورت گنجائش ہو گی، البتہ محض لذت میں اضافے کے حصول کے لیے اس کا استعمال جائز نہیں ہوگا۔