سوال: السلام علیکم، کوئی شخص امام کے ساتھ ایسے وقت میں شامل ہو جب وہ قیام کے علاوہ کسی حالت میں ہو تو مقتدی تکبیر تحریمہ کے بعد ہاتھ باندھے گا یا سیدھا اس حالت میں چلا جائے گا؟

جواب: واضح رہے کہ تکبیر تحریمہ کا فرض صرف قیام یا قیام کے قریب کی حالت میں " اللہ اکبر " کہنے سے ادا ہو جاتا ہے، اس کے بعد ہاتھ باندھ کر ثناء پڑھنا مسنون ہے، لہذا اگر امام رکوع میں ہو اور مقتدی کو یہ اطمینان ہو کہ وہ تکبیر تحریمہ کہہ کر ہاتھ باندھ کر اور ثناء پڑھنے کے بعد بھی رکوع میں امام کے ساتھ شامل ہو جائے گا اور اسے رکعت مل جائے گی تو ایسی صورت میں اسے چاہیے کہ وہ تکبیر تحریمہ کہہ کر ہاتھ باندھ کر اور ثناء پڑھنے کے بعد رکوع میں شریک ہو، البتہ اگر رکعت فوت ہوجانے کا اندیشہ ہو تو تکبیر تحریمہ کے بعد ہاتھ باندھے اور ثناء پڑھے بغیر رکوع کی تکبیر کہہ کر امام کے ساتھ رکوع میں شامل ہو جائے۔