سوال: آج کل ایک ایپ کی تشہیر ہو رہی ہے، جسے Markaz aap کہا جاتا ہے، جہاں آپ ایک آئٹم کو منتخب کر سکتے ہیں، اپنے منافع کا مارجن رکھ سکتے ہیں اور مختلف سوشل میڈیا پلیٹ فارمز پر فروخت کے لیے پیش کر سکتے ہیں۔ اگر پراڈکٹ بیچی جائے تو خریدار براہِ راست وینڈر سے پراڈکٹ حاصل کرے گا، جبکہ بیچنے والے کو اس کا منافع ملتا ہے، کیا یہ حلال ہے؟

جواب: ہماری معلومات کی حد تک مرکز ایپ (Markaz App) پر لوگ اپنا اکاؤنٹ بناکر مختلف مصنوعات کی تصاویر اور تفصیلات لیکر سوشل میڈیا پر شیئر کرکے ان کی مصنوعات کو بکواتے ہیں، جس کے عوض انہیں مرکز ایپ کی طرف سے طے شدہ کمیشن/ مارجن دیا جاتا ہے، اس لحاظ سے مرکز ایپ سے وابستہ افراد اس کے ایجنٹ ہوتے ہیں، کوئی چیز بکوانے کے عوض طے شدہ کمیشن لینا جائز ہے، لہذا مرکز ایپ اور ایجنٹس کا آپس کا معاملہ شرعا درست ہے، بشرطیکہ اس کے ناجائز ہونے کی اور وجہ نہ پائی جائے۔
البتہ یہ مصنوعات چونکہ مرکز ایپ کی اپنی نہیں ہوتیں، بلکہ اس کے ذریعے مختلف کمپنیوں کا سامان فروخت کیا جاتا ہے، اس صورت میں مرکز ایپ اگر متعلقہ کمپنی کی وکیل/ایجنٹ بن کر طے شدہ کمیشن طے کر کے اجرت کے عوض سامان فروخت کرادے تو یہ معاملہ بھی جائز ہوگا، لیکن مرکز ایپ متعلقہ کمپنی کی وکیل اور ایجنٹ نہ ہو تو ایسی صورت میں مرکز ایپ اور متعلقہ کمپنی کے درمیان معاملہ کی مکمل وضاحت لکھ کر دوبارہ شرعی حکم معلوم کرسکتے ہیں۔