سوال: میں نے نیٹ سے نماز کی سافٹ کاپی لے کر اس میں اضافہ کر کے فی سبیل اللہ تقسیم کرنے کے لیے نماز کی کتاب چھپوائی ہے۔ جس ادارہ کی نماز کی سافٹ کاپی میں نے اٹھائی ہے اس سے کوئی اجازت نہیں لی تو کیا میں گنہگار تو نہیں ہوا؟ کیا ان سے اجازت لینا ضروری تو نہیں تھا؟

جواب: واضح رہے کہ کسی بھی کتاب، رسالے یا مضمون کا اصل مالک لکھنے والا یعنی مصنف ہوتا ہے، لہذا اگر مصنف یا پبلشر کتاب کے حقوقِ طبع کو باقاعدہ قانونی طریقے سے محفوظ کراتا ہے تو اس کا مطلب یہ ہے کہ مصنف کی طرف سے اس کتاب کو شائع کرنے کی عام اجازت نہیں ہے، اس صورت میں کتاب کو شائع کرنے سے پہلے مصنف یا پبلشر سے پیشگی اجازت لینا ضروری ہوگی۔
پوچھی گئی صورت میں اگر آپ نے کوئی ایسی کتاب جس کے حقوقِ طبع قانوناً محفوظ ہیں، ترمیم یا اضافہ کرکے شائع کی ہے تو آپ قانونی جرم کے مرتکب ہوئے ہیں، آپ کو چاہیے کہ فوراً مصنف یا پبلشر سے رابطہ کرکے معاملہ صاف کرلیں، اور اگر مصنف یا پبلشر نے باقاعدہ قانونی طور پر کتاب کے حقوق طبع محفوظ نہیں کیے ہوں تو اس صورت میں بھی اخلاقاً آپ کو چاہیے کہ ان سے رابطہ کرکے اجازت لے لیں۔