سوال: مفتی صاحب! پوچھنا یہ ہے کہ: 1) میں آفس میں کام کرتا ہوں، آفس والوں نے نماز پڑھنے کی جگہ مختص کی ہوئی ہے، جہاں پر آفس اسٹاف نماز پڑھتے ہیں، کیا یہ درست عمل ہے؟
2) جب وہاں فرض نماز کا وقت ہوتا ہے تو جب تک باس نہیں آتے تب تک جماعت کھڑی نہیں ہوتی، کبھی کبھار ہم لوگ مل کر جماعت کھڑی کر لیتے ہیں، اس پر باس سے بحث بھی ہوچکی ہے، اس کی وجہ سی میری نوکری بھی جاسکتی ہے، اب میں اسی وجہ سے جب تک باس نہیں آتے جماعت کھڑی نہیں کرتا اور آفس اسٹاف بھی انتظار کرتے رہتے ہیں۔ اس مسئلہ میں رہنمائی فرمائیں۔

جواب: 1) اگر قریب میں کوئی مسجد نہ ہو جہاں با آسانی آفس کا عملہ باجماعت نماز پڑھ سکتا ہو، تو ایسی صورت میں آفس میں مصلّیٰ (جائے نماز ) بنانا جائز بلکہ اچھا ہے، البتہ آفس میں باجماعت نماز پڑھنے کی صورت میں جماعت سے نماز پڑھنے کا ثواب تو ملے گا، لیکن مسجد میں باجماعت نماز ادا کرنے کا ثواب نہیں ملے گا۔

2) بہتر یہ ہے کہ سب مل کر باس (Boss) کے مشورے سے ہر نماز کا وقت متعین کرلیں، پھر اس وقت میں باس سمیت سب پہنچنے کی کوشش کریں، لیکن اس کے بعد بھی اگر باس کو کسی عذر کی وجہ سے آنے میں تاخیر ہوجائے تو ان کے لیے تھوڑی دیر انتظار کرنے میں شرعاً کوئی حرج نہیں ہے، بشرطیکہ نماز کے وقت میں گنجائش ہو۔