سوال: مفتی صاحب! کیا یہ حدیث درست ہے؟ "قیامت کے دن دعوت وتبلیغ کا کام کرنے والوں کی کرسیاں انبیاء کرام علیہم السلام کے ساتھ ہوں گی، فرق صرف یہ ہوگا کہ اُن کی کرسیوں پر مہرِ نبوت نہیں ہوگی"۔

جواب: سوال میں مذکور حدیث: "قیامت کے دن دعوت و تبلیغ کے کام کرنے والوں کى کرسیاں انبیاء کرام کے ساتھ ہوں گی" یہ حدیث دعوت وتبلیغ کے مبارک کام کى عظمت کے سلسلے میں بیان کى جاتى ہے، ہمیں تلاش کے باوجود نہیں مل سکى ہے، لہذا اسے حدیث کے عنوان سے بیان نہ کیا جائے۔
البتہ اللہ تعالیٰ اور رسول صلی اللّٰہ علیہ وسلم کی اطاعت کرنے والوں کے انعام میں قرآن کریم میں یہ بات واضح طور پر مذکور ہے: "اور جو لوگ اللہ اور رسول کی اطاعت کریں گے تو وہ ان کے ساتھ ہوں گے جن پر اللہ نے انعام فرمایا ہے، یعنی انبیاء، صدیقین، شہداء اور صالحین۔ اور وہ کتنے اچھے ساتھی ہیں"۔ (سورۃ النساء: آیت نمبر: 69)
لہذا اللہ تعالى اور اس کے رسول صلی اللّٰہ علیہ وسلم کى اطاعت کرنے والوں کا حشر انبیاء، صدیقین، شہداء اور صالحین کا یہ مقام و مرتبہ ان شاءاللہ ضرور ملے گا، خواہ وہ دین کی دعوت دینے والے ہوں، یا دین کسی دوسرے شعبے میں کام کرنے والا ہوں۔