سوال: اگر خروج ریح کے بعد مقعد پر ایسی ہلکی سی رطوبت آجائے جس کی وجہ سے ٹیشو پیپر پر ہلکا سا نشان آجائے تو کیا استنجاء ضروری ہوگا یا اتنا حساس نہیں ہونا چاہیے؟ سائل کو وضو میں تین بار اعضاء دھو کر بھی ایسا محسوس ہوتا ہے کہ شاید کوئی عضو خشک نہ رہ گیا ہو، اسی طرح غسل میں بھی بے تحاشہ پانی استعمال کرنے پر مجبور ہے کہ تسلی ہی نہیں ہوتی، اسی طرح استنجاء کے وقت بھی سائل اسی ٹینشن میں رہتا ہے کہ کہیں کپڑے اور بدن ناپاک نہ رہ جائیں۔

جواب: واضح رہے کہ خروجِ ریح کے بعد اگر یقینی طور پر شرمگاہ سے ہلکی سی رطوبت نکل آئے تو اس کی وجہ سے استنجاء اور وضو کرنا ضروری ہوگا، لیکن سوال میں سائل نے اپنی شک و شبہ والی جو کیفیت بیان کی ہے، اس سے معلوم ہوتا ہے کہ سائل کو شک و شبہ کی وجہ سے خروج ریح کے بعد مقعد پر رطوبت محسوس ہوتی ہے، جبکہ حقیقتاً رطوبت خارج نہیں ہوتی ہے، اس کا شرعاً کوئی اعتبار نہیں ہے، بلکہ اس طرح کی کیفیت دراصل شیطان کی طرف سے ہوتی ہے جو ایک مسلمان کو عبادت اور اللہ سے دور کرنے کے لیے حربہ کے طور پر وہ استعمال کرتا ہے، لہذا ایسی حالت میں ایک مسلمان کو ان شکوک وشبہات میں پڑھنے کے بجائے اس طرف دھیان دینا چاہیے کہ یہ در اصل شیطانی حربہ ہے جو مجھے اللہ تعالیٰ اور اس کی عبادت سے دور کرنا چاہتا ہے، جبکہ اللہ تعالیٰ نے اس سے بچنے کا حکم دیا ہے، اس لیے میں اللہ کے فضل وکرم سے اس کا مقابلہ کرکے ان شکوک وشبہات میں ہرگز نہیں پڑوں گا، یقیناً اس سوچ کو اپنانے سے ایک شکی مزاج آدمی انشاء اللہ ہر قسم کے شک اور شبہ سے محفوظ رہے گا۔
لہذا سائل کو چاہیے کہ اس سوچ اور فکر کو سامنے رکھے، اس کی وجہ سے ان شاء اللہ وہ وضو اور غسل کے معاملے میں ہر قسم کے وسوسوں سے محفوظ رہے گا۔