سوال: میری خالہ کے بیٹے نے میرے پاس کچھ رقم بطور امانت رکھوائی تھی، اب اس کا انتقال ہوگیا ہے، جو غیر شادی شدہ تھا، اس کی کوئی اولاد نہیں ہے، وہ اپنے والدین کی اکلوتی اولاد تھی۔ اس کے والدین بھی وفات پا چکےہیں، البتہ اس کی کچھ خالائیں اور ماموں حیات ہیں اور ان کی اولادیں بھی ہیں۔ اس کی ایک خالہ کی بیٹی کی طرف سے تقاضا ہے کہ مرحوم نے مرنے سے پہلے کہا تھا کہ مرحوم کے جو پیسے میرے پاس بطور امانت رکھیں ہوئے ہیں، وہ اس کو دے دیے جائیں، البتہ اس بات کی تصدیق کیلئے کسی کے پاس کوئی ثبوت موجود نہیں۔ براہ کرم آپ رہنمائی فرمائیں کہ مجھے کیا کرنا چاہیے؟

جواب: سوال میں ذکر کرده الفاظ "جو پیسے میرے پاس بطور امانت رکھیں ہیں، وہ اس کو دے دیے جائیں" شرعاً ہبہ (گفٹ) کے ہیں، وصیت کے نہیں ہیں، اور ہبہ کے درست ہونے کے لیے محض ہبہ کے الفاظ کا ہونا کافی نہیں ہے، بلکہ ہبہ کردہ چیز موہوب لہ (جس شخص کو ہبہ کیا جارہا ہے) کے قبضہ میں دینا بھی ضروری ہے، چونکہ مذکورہ صورت میں مرحوم نے اپنی حیات میں اس رقم کا قبضہ اپنی خالہ کی بیٹی کو نہیں دیا تھا، لہذا یہ ہبہ شرعاً درست نہیں ہوا ہے۔
اور اگر مرحوم نے ان الفاظ کا اضافہ بھی کیا ہو کہ "میرے مرنے کے بعد یہ رقم میری خالہ کی بیٹی کو دی جائے" تو اگرچہ یہ الفاظ شرعاً وصیّت کے ہیں، لیکن چونکہ اس دعوی پر مدّعی کے پاس شرعی گواہ نہیں ہیں، لہذا اس وصیت پر عمل نہیں کیا جائے گا اور بہر دو صورت مذکورہ رقم پر مرحوم کی ملکیت اس کی وفات تک برقرار سمجھی جائے گی، اس لیے اب مرحوم کی وفات کے بعد یہ رقم مرحوم کے شرعی ورثاء میں ان کے شرعی حصوں کے مطابق تقسیم کی جائے گی۔
نوٹ: سوال میں چونکہ مرحوم کے دادا، دادی، نانی، چچا، چچا کی اولاد اور ذوی الارحام رشتہ داروں (مثلاً: پھوپھی، ماموں، خالا) کا ذکر تفصیل سے موجود نہیں ہے، لہذا اس رقم میں شرعی ورثاء کا حصہ معلوم کرنے کے لیے مرحوم کے رشتہ داروں کی تفصیل وضاحت کے ساتھ لکھ کر دوبارہ سوال بھیجیں۔