سوال: میری پیاری والدہ کا انتقال پچھلے ماہ ہوا ہے، وہ کچھ رقم چھوڑ کر گئیں تھیں اور کہہ گئیں تھیں کہ ان کا کفن دفن اس رقم سے کیا جائے، مگر کفن دفن ہم نے اپنے پیسوں سے کر لیا تھا، اب اس رقم سے کیا کیا جائے کہ والدہ کو قیامت تک ثواب ملتا رہے۔اس کے علاوہ بہترین صدقہ جاریہ کا بھی بتا دیں۔

جواب: پوچھی گئی صورت میں جب کفن و دفن کا انتظام آپ لوگوں نے اپنی طرف سے کردیا تھا تو والدہ کی تدفین و تکفین کے لیے چھوڑی ہوئی رقم والدہ کی میراث میں شامل ہوگی اور اس میں سب ورثاء کا حق ہوگا، لہذا تمام ورثاء کی دلی رضامندی سے اس رقم کو والدہ کے ایصالِ ثواب کے لیے صدقہ جاریہ کے کاموں میں خرچ کیا جاسکتا ہے، اور صدقہ جاریہ کے لئے ایسے کام کا انتخاب کرنا بہتر ہے جس کی ضرورت بھی زیادہ ہو اور جس کا فائدہ بھی عرصے تک لوگ اٹھاتے رہیں، جس کا فیصلہ اپنے حالات اور علاقے کے اعتبار سے ہر شخص خود کرسکتا ہے۔
البتہ اگر سب ورثاء کی رضامندی نہ ہو یا کچھ ورثاء نابالغ ہوں تو اسں صورت میں میراث (مذکورہ رقم) کی تقسیم سے پہلے اس کو صدقہ جاریہ میں خرچ کرنا جائز نہیں ہے، تقسیم میراث کے بعد بالغ ورثاء اگر چاہیں تو اپنے حصہ کی رقم صدقہ جاریہ میں خرچ کرسکتے ہیں۔