سوال: السلام علیکم! اگر کوئی معذور شرعی غروبِ آفتاب سے پانچ منٹ پہلے وضو کرے اور دورانِ وضو اور وضو کے بعد جس کے سبب وہ معذور ہے، وہ عذر پیش بھی نہ آئے تو کیا عصر کا وقت جانے سے وضو ٹوٹ جائے گا؟

جواب: واضح رہے کہ معذور شرعی کو نماز کا وقت ختم ہونے کے بعد نیا وضو کرنے کا حکم اس وقت دیا جاتا ہے، جب طہارت حاصل کرنے کے دوران یا بعد میں وہ عذر پیش آجائے، جس کی وجہ سے معذور کے حکم میں ہوا ہے، لیکن اگر دورانِ طہارت یا بعد میں وہ عذر پیش ہی نہ آئے تو محض نماز کا وقت نکلنے سے اس کا وضو نہیں ٹوٹے گا، لہذا پوچھی گئی صورت میں اس شخص نے غروب آفتاب سے کچھ پہلے جو وضو کیا تھا، وہ وقت نکلنے کے بعد بھی برقرار رہے گا، بشرطیکہ وہ عذر یا کوئی اور ناقض وضو (وضو توڑنے والی چیزیں) پیش نہ آیا ہو۔