سوال:
ہم نے سنا ہے کہ اگر کوئی نماز پڑھ رہا ہو اور دوسرا اس کے آگے کھڑا ہو جائے تو تیسرا اس کے سامنے سے گزر سکتا ہے۔ اس سلسلہ میں سوال یہ ہے کہ اگر یہ دوسرا شخص کھڑا نہ ہو بلکہ بیٹھا ہوا ہو تو بھی تیسرا شخص گزر سکتا ہے یا نہیں؟
جواب: واضح رہے کہ سترہ کا مقصد نمازی اور گزرنے والے کے درمیان کسی آڑ وغیرہ کا حائل ہونا ہے، لہذا اگر نماز پڑھنے والے کے سامنے بیٹھے ہوئے شخص کی اونچائی سترہ (تقریباً ڈیڑھ فٹ لمبائی اور کم از کم ایک انگلی کے برابرموٹی چیز) کی مقدار کے برابر ہو تو ایسی صورت میں نمازی کے آگے بیٹھے ہوئے شخص کے سامنے سے گزرنا جائز ہوگا۔
واللہ تعالی اعلم بالصواب
دارالافتاء الاخلاص،کراچی