سوال: السلام علیکم،
مفتی صاحب !
میری ایک پھوپھی جو غیر شادی شدہ اور ہمارے ساتھ ہی رہتی تھیں، انکا ابھی دسرے روزے کو انتقال ہوا ہے، انہوں نے وفات سے کچھ دن پہلے میری بہن ( ماریہ ) کو بلا کر اپنے سونے ( گولڈ ) کے بارے میں یہ وصیت کی کہ جو تمھارے پاس میں نے سونا رکھوایا ہے، اس میں سے اتنا فلاں کو دے دینا، پھر باقی جو بچے وہ تم رکھ لینا تو انکی اِس وصیت پر عمل کر کے میری بہن اپنے پاس رکھ سکتی ہے یا یہ بتانا پڑیگا ؟ جب کہ زندگی میں بھی کہتی تھیں کہ جو میرا سونا ہے وہ میں ماریہ کو دونگی، انہوں نے ہوش و حواس میں یہ کہا تھا میری بہن کو
اور جب میری بہن کو یہ کہا انہوں نے کہ تمھارا ہو گیا جو باقی بچے تو میری بہن نے کہا کہ مجھے کچھ نہیں چاہیئے بس آپ پھر سے اپنے پیروں میں کھڑی ہو جائیں،
اور انہوں نے میرے ابو اور دوسری پھوپھو کے سامنے بھی یہ کہا کہ اس گولڈ میں سے فلاں چیز فلاں کو دے دینا، تو اب وضاحت کردیجئے کہ کیا کرنا چاہیے؟ اسکو وارثوں میں باٹ دیا جائے یا انکی اِس وصیت پر عمل کیا جائے پہلے ؟

جواب: واضح رہے کہ میت اگر وفات سے قبل اپنے شرعی وارث کے علاوہ کسی دوسرے کے لیے وصیت کرے، تو یہ وصیت ترکہ کے ایک تہائی تک نافذ ہوتی ہے، بقیہ دو تہائی میں ورثاء کا حق ہے۔
 اوراگر وصیت کسی وارث کے لیے کی ہو، تو وہ معتبر نہیں ہے، ایک تہائی کے علاوہ میں تمام ورثاء کا حق ہے، ہاں ! اگر وہ اپنی خوشی سے اجازت دے دیں تو یہ ان کا صوابدیدی اختیار ہے۔