سوال: ایک خاتون جن کی عمر سینتیس سال ہے، ان کو دس محرم کو تین طلاقیں ہوئی تھیں، ان کے ہارمونز کا مسئلہ ہے جس کی وجہ سے حیض نہیں آرہا ہے، کافی علاج کروایا ہے اب ڈاکٹروں نے بھی لاعلاج کر دیا ہے اور یہ بات بھی واضح ہے کہ ان کو حمل نہیں ہے طلاق کو سات ماہ ہوگئے ہیں، کیا اس خاتون کی عدت مکمل ہوگئی ہے اور کیا اس کا دوسری جگہ نکاح کر سکتے ہیں؟
تنقیح: محترم اس بات کی وضاحت کردیں کہ مذکورہ عورت کو شروع ہی سے حیض نہیں آرہا یا یہ کہ پہلے آتا تھا بعد میں حیض کا سلسلہ منقطع ہوگیا ہے؟ اس وضاحت کے بعد آپ کے سوال کا جواب دیا جاسکے گا۔
جواب تنقیح:
نہیں! طلاق کے بعد بھی ایک حیض ہوا ہے، اس کے بعد علاج کروایا اور پھر ڈاکٹروں نے لا علاج کر دیا۔

جواب: پوچھی گئی صورت میں اصل حکم یہ ہے کہ مذکورہ عورت ماہواری کے ختم ہونے کی عمر (جو کہ پچپن سال ہے) تک انتظار کرنے کے بعد تین ماہ کی عدت گزار کر کہیں اور نکاح کرسکتی ہے، تاہم اگر اتنے لمبے عرصہ تک اس کے لیے انتظار کرنا مشکل ہو اور واقعتاً علاج و معالجہ کے باجود مذکورہ عورت کی ماہواری کا سلسلہ دوبارہ بحال نہیں ہوسکا ہے تو ایسی مجبوری کی صورت میں طلاق کے وقت سے ایک سال کی عدت گزار کر دوسری جگہ نکاح کرنا اس کے لیے جائز ہے۔
البتہ اگر سال مکمل ہونے سے پہلے ماہواری کا سلسلہ دوبارہ بحال ہوجائے تو پھر نئے سرے سے تین ماہواری کے ذریعے عدت مکمل کرنا ضروری ہوگا۔
واضح رہے کہ فقہ حنفی کے مطابق جس عورت کی ماہواری کا سلسلہ منقطع ہوجائے تو اس کی عدت کے بارے میں اصل حکم یہ ہے کہ وہ ماہواری آنے تک انتظار کرے، جب اس کو تین ماہواریاں آجائیں، تب اس کی عدت مکمل ہوگی، اور اگر اس کو بالکل ماہواری نہ آئے تو جب اس کی عمر سنِ ایاس (پچپن سال) کو پہنچ جائے تو اس کے بعد وہ تین مہینے گزار کر اپنی عدت مکمل کرے گی، لیکن فقہ مالکی کے مطابق ایسی عورت کی عدت ایک سال میں پوری ہوجائے گی، اور ضرورت کے وقت اِس مسئلہ میں فقہاء احناف نے فقہ مالکیہ کے مطابق فتویٰ دینے کی صراحت کی ہے، بشرطیکہ علاج ومعالجہ کے باجود ماہواری کا سلسلہ دوبارہ بحال نہ ہوسکے۔