سوال: السلام علیکم،
اکثر و بیشتر مختلف مریضوں کو خون کی ضرورت پیش آتی رہتی ہے، کسی کو بھی خون کا عطیہ دینا یا وصیت کر کے اپنے اعضاء عطیہ کرنا اسلام میں اس بارے میں کیا حکم ہے؟

جواب: (1) انسان کا خون دوسرے کے بدن میں داخل کر نا (یعنی استعمال کرنا ) دو وجہ سے حرام ہے۔

(۱) خون انسان کا جزو ہونے کی وجہ سے واجب التکریم ہے۔
(۲)انسان کا خون بدن سے نکال لیا جائے تو وہ نجس ہے، لہذا عام حالات میں جب کہ کوئی اضطراری صورت نہ ہو، آیت قرآنی حرمت علیکم المیتۃ والدم کے پیش نظر اس کا استعمال حرام ہوگا، البتہ جب کسی مریض کی ہلاکت کا خطرہ ہو اور خون دینے سے اس کی جان بچنے کا ظن غالب ہو اور خون دینے کے علاوہ کوئی متبادل دوا بھی نہ ہو تو ایسی اضطراری حالت میں بقدر ضرورت مریض کو خون دینا جائز ہے، اور اس صورت میں کوئی مسلمان دوسرے کو (یعنی مریض کو ) اپنا خون مفت دے تو اس کی بھی گنجائش ہے، بشرطیکہ خود کی ہلاکت کا اندیشہ نہ ہو۔
محض منفعت، زینت، قوت و طاقت بڑھانا مقصود ہو تو ایسی صورت میں کسی کا خون استعمال کرنا اور خون دینا ہر گز جائز نہیں۔
(2) واضح رہے کہ مندرجہ ذیل شرائط کے ساتھ انسانی اعضاء کو عطیہ کیا جا سکتا ہے :
(1 ) جس کو عضو دیا جارہا ہو، اگر اس کو یہ عضو نہیں لگایا جائے تو غالب گمان یہ ہو کہ وہ مرجائے گا۔ جیسے گردہ وغیرہ 
(2 ) جو شخص عضو عطیہ کررہا ہے، اگر اس سے یہ عضو نکالا جائے تو غالب گمان یہ ہو کہ یہ شخص اس عضو کے نکلنے کے بعد زندہ رہے گا۔
(3 ) کوئی اور متبادل دوا یا علاج اس شخص کے لیے نہ ہو۔
(4 ) اس عضو کے عطیہ کرنے کے بدلے میں رقم لینا نہ ہو۔
مذکورہ بالا اصول کی بنیاد پر آنکھ عطیہ کرنا کسی صورت میں جائز نہیں ہے، کیونکہ آنکھ کے بغیر انسان کے زندہ رہنے کا احتمال ہے۔
واضح رہے کہ یہ تمام احکامات زندگی میں عطیہ کرنے کے ہیں، مرنے کے بعد اعضاء کے عطیہ کرنے کی وصیت کرنا ناجائز ہے۔