سوال: اگر کسی نے منت مانی ہو کہ میرا فلاں کام ہو جائے تو میں کسی مزار پر دیگ دوں گی۔ اب جبکہ کام ہو گیا ہے تو انکے دل میں یہ خیال آیا ہے کہ اس طرح دیگ مزار پر دینا درست ہے یا غلط اور کیا اس کی جگہ کسی غریب کو پیسے دیئے جا سکتے ہیں یا نہیں؟

جواب: نذر ومنت صحیح ہونے کے لئے ضروری ہے کہ جو نذر مانی جارہی ہے، وہ عبادت مقصودہ ہو اور معصیت و گناہ کی نذر نہ ہو، لہذا صورت مسئولہ میں اگر نذر و منت سے مقصود اللہ کے نام پر مزار کے فقراء اور خدام کو کھانا کھلانا ہے تو یہ جائز ہے، لیکن اگر نذر و منت سے مقصود صاحبِ مزار کے نام پر کھلانا ہو تو یہ گناہ اور موجبِ شرک ہے، کیونکہ یہ" مَا اُھِلَ بِہٖ لِغَیْرِ اللہ" یعنی غیراللہ کے نام کی نذر و نیاز میں داخل ہے جو کہ ناجائز اور حرام ہے، اس صورت میں یہ منت منعقد ہی نہیں ہوئی، لہذا اس کا پورا کرنا لازم نہیں ہے۔
واضح رہے کہ اگر مقصود اللہ کے نام پر فقراء کو کھلانا ہے تو یہ نذر صحیح ہےاور اس کو پورا کرنا ضروری ہے، اس صورت میں کسی بھی فقیر کو کھلادیں تو درست ہے، مزار ہی کے فقراء کو کھلانا ضروری نہیں ہے۔