سوال: حضرت! واجب صدقہ اور نفلی صدقہ میں کیا فرق ہے؟

جواب: صدقہ مال کے اس حصے کو کہا جاتا ہے، جو اللہ تعالیٰ کی رضا کیلئے خرچ کیا جائے۔ لفظ صدقہ اپنے اصلی معنی کی اعتبار سے عام ہے، نفلی صدقہ کو بھی کہا جاتا ہے اورفرض صدقہ یعنی زکوٰۃ کو بھی کہا جاتا ہے، لیکن جب لفظ صدقہ مطلق بولا جائے اور نفلی صدقہ کا کوئی قرینہ موجود نہ ہو، تو اس سے زکوٰۃ ہی مراد لیں گے، جیسا کہ قرآن مجید میں لفظ صدقہ کو زکوٰۃ پر محمول کیا گیا ہے۔ (اِنَّمَا الصَّدَقَاتُ لِلْفُقَرَاءِ… سورۃ توبہ:۷۲۰) اور اسی طرح (خُذْ مِنْ اَمْوَالِھِمْ صَدَقَۃً تُطَھِّرُھُمْ…سورۃ توبہ:۱۰۳) اور جہاں قرینہ سے یہ بات واضح ہورہی ہو کہ یہاں صدقات نافلہ مراد ہیں تو اُس سے زکوٰۃ نافلہ مراد لیں گے اور اس سے فرض زکوٰۃ مراد نہیں لیا جائے گا۔
لہذا خلاصہ کلام یہ ہے کہ
واجب صدقہ سے مراد زکوة اورصدقہ فطر وغیرہ ہیں اور نفل صدقہ سے مراد عام صدقہ ہے یعنی اللہ کے نام پر کوئی چیز دینا اور دوسرا فرق یہ ہے کہ صدقہ واجبہ صرف مستحق زکوة ہی کو دیا جاسکتا ہے اور نفلی صدقہ ہر کسی کو دے سکتے ہیں۔