سوال: مفتی صاحب! زکوۃ یا قربانی کون سے نصاب(ساڑھے سات تولے سونا یا ساڑھے باون تولہ چاندی) رکھنے والے پر واجب ہے؟ اگر کسی کے پاس ساڑھے باون تولہ سونا چاندی نہ ہو اور سونا اس کے پاس دو تولے ہو تو کیا اس پر قربانی فرض ہے اور کیا اس کو زکوۃ بھی دینی ہے؟ کیونکہ ساڑھے باون تولہ چاندی کی قیمت تو دو لاکھ کی مالیت کے اندر ہی آتی ہے۔ ہمارے پاس چاندی نہیں ہے، لیکن سونے کی مالیت ساڑھے باون تولے چاندی کی مالیت کے برابر ہے تو کیا ہم کو زکوۃ بھی دینی ہے اور قربانی بھی کرنی ہے؟ براہ کرم اس کا جواب دیں

جواب: واضح رہے کہ زکوة اور قربانی صاحب نصاب پر واجب ہوتی ہے، البتہ دونوں کے نصاب میں کچھ فرق ہے۔
زکوة واجب ہونے کا نصاب:
واضح رہے کہ زکوة کے نصاب کے لئے مال کا نامی (سونا، چاندی، نقد رقم اور مال تجارت) ہونا، اور اس پر سال کا گزرنا شرط ہے، لہذا اگر کسی شخص کے پاس ساڑھے سات تولہ سونا ہو یا ساڑھے باون تولہ چاندی ہو یا دونوں میں سے کسی ایک کی مالیت کے برابر نقدی یا سامانِ تجارت ہو تو ایسے شخص پر سال پورا ہونے پر ڈھائی فیصد زکوۃ ادا کرنا لازم ہوگا۔
اسی طرح اگر کسی کے پاس نہ پورا ساڑھے سات تولہ سونا ہو اور نہ ہی ساڑھے باون تولہ چاندی، اور نہ ان کے برابر نقدی اور مال تجارت ہو، لیکن اس کی ملکیت میں موجود ان سب قسم کے یا ان میں سے بعض قسم کے اموال کو ملا کر مجموعی مالیت چاندی کے نصاب کی مالیت کے برابر بنتی ہو تو اس صورت میں بھی مذکورہ شخص صاحب نصاب شمار ہوگا۔
قربانی کا نصاب:
قربانی کے نصاب میں نہ تو مال کا نامی ہونا شرط ہے، اور نہ ہی اس پر سال کا گزرنا شرط ہے، البتہ صاحب نصاب کا مقیم ہونا شرط ہے، جس کا مطلب یہ ہے کہ اگر صاحب نصاب عید الاضحی کے دنوں میں مسافر ہوگا تو اس پر قربانی واجب نہیں ہوگی، لہذا اگر کسی مقیم شخص کی ملکیت میں بارہ ذی الحجہ کے سورج غروب ہونے سے پہلے تک ساڑھے سات تولہ سونا یا ساڑھے باون تولہ چاندی ہو یا ان دونوں کو ملا کر ساڑھے باون تولہ چاندی کی مالیت بنتی ہو یا پھر ساڑھے باون تولہ چاندی کی مالیت کے بقدر مال ہو جو اس شخص کی ضرورت سے زائد ہو تو ایسے شخص پر قربانی واجب ہوگی، نیز سفر اور اقامت میں بھی آخری (بارہ ذی الحجہ کے غروب سے پہلے والی) حالت کا اعتبار ہوگا۔
پوچھی گئی صورت میں اگر آپ کی ملکیت میں صرف دو تولہ سونا ہے اور اس کے ساتھ چاندی، نقد روپیہ یا مال تجارت نہیں ہے تو چونکہ یہ سونے کا مکمل نصاب نہیں ہے، اس لیے صرف دو تولہ سونے پر زکوۃ واجب نہیں ہوگی، لیکن اگر دو تولہ سونا کے ساتھ کچھ مقدار چاندی کی موجود ہے یا کچھ نقد رقم ہے، جو ضرورت سے زائد ہے یا پھر مال تجارت ہے، اور ان کی کل مالیت ساڑھے باون تولہ چاندی کی مالیت تک پہنچ رہی ہے تو اس صورت میں آپ صاحب نصاب ہیں، لہذا سال پورا ہونے پر (اگر آپ صاحب نصاب رہیں) تو آپ پر ڈھائی فیصد کے حساب سے زکوٰۃ ادا کرنا لازم ہوگی، جبکہ قربانی کے نصاب کا حساب لگاتے ہوئے ضرورت سے زائد سامان کی مالیت کو بھی شامل کیا جائے گا، لہذا اگر عید الاضحی کے دنوں میں آپ کی ملکیت میں موجود ضرورت سے زائد کل اموال و سامان کی مالیت ساڑھے باون تولہ چاندی کی قیمت کو پہنچ رہی ہو تو آپ پر قربانی واجب ہوگی۔