سوال: کیا حج کے لیے باندھے گئے احرام کو بغیر کسی شرعی عذر کے کھولا جا سکتا ہے یعنی کیا گرمی کی وجہ سے نہانے کے لئے، وضو کرنے لیے، میلا ہونے کی وجہ سے تبدیل کرنے کے لیے کھولا جاسکتا ہے؟ کیا احرام کی حالت میں ریش کریم استعمال کی جا سکتی ہے، نیز کیا احرام کی حالت میں غسل کیا جا سکتا ہے کہ نہیں؟

جواب: واضح رہے کہ احرام میں شروع سے آخر تک ایک ہی چادر میں تمام افعالِ احرام ادا کرنا ضروری نہیں، بلکہ اگر پہلی چادر میلی ہوجائے تو دوسری چادر بدلنا یا اسی کو دھو کر پہن لینا جائز ہے، نیز گرد وغبار دور کرنے یا ٹھنڈک حاصل کرنے کے لیے بھی خوشبو والا صابن استعمال کئے بغیر غسل کرنا جائز ہے، لیکن میل دور نہ کرے، کیونکہ احرام میں پراگندہ حالت اور میل کچیل اللہ تعالی کو پسند ہے، لہذا پوچھی گئی صورت میں احرام کی چادر کو وضو کرنے، غسل کرنے یا دھونے کی غرض سے نکالنا جائز ہے۔ نیز ریش کریم (Rash Cream) میں اگر خوشبو نہ ہو تو اسے حالت احرام میں لگانا ممنوع نہیں ہے۔