سوال: مفتی صاحب! میری بیوی کی خالہ طلاق یافتہ تھیں، ان کا انتقال 10 دن پہلے ہوا ہے، انہوں نے میری بیوی کے پاس ایک شاپر اپنے شوہر اور اپنے بچوں سے چھپا کر یہ کہہ کر رکھوایا تھا کہ یہ آپ کسی کو دینا نہیں۔ اس شاپر میں کچھ کپڑے تھے، ان کے انتقال کے بعد جب یہ شاپر ہم نے کھول کر دیکھا تو پتا چلا اس میں 55000 روپے بھی ہیں۔ ان کے تین بیٹے ہیں جو اپنے والد کے ساتھ ہی رہتے ہیں، بیٹوں کی عمر ایک کی 18 سال، ایک کی 11 سال اور ایک کی 8 سال ہے۔ براہ کرم رہنمائی فرمائیں کہ ہم یہ پیسے کس کے حوالے کریں؟
تنقیح: محترم اس بات کی وضاحت کردیں کہ طلاق کے کتنے عرصہ بعد مذکورہ عورت کا انتقال ہوا ہے۔ اس وضاحت کے بعد آپ کے سوال کا جواب دیا جاسکے گا۔
جواب تنقیح: مفتی صاحب! طلاق کے تقریباً 7 ماہ بعد خالہ کا انتقال ہوا ہے۔

جواب: پوچھی گئی صورت میں مذکورہ رقم کی حیثیت امانت کی ہے، اور امانت رکھوانے والا شخص جب امانت وصول کرنے سے پہلے فوت ہوجائے تو امانت میں رکھی ہوئی چیز اس کی میراث میں شامل ہوکر اس کے ورثاء کے درمیان شرعی طریقہ کار کے مطابق تقسیم کی جائے گی، لہذا مذکورہ رقم مرحومہ کی میراث میں شامل ہو کر اس کے تینوں بیٹوں (اور اگر اس کے والدین زندہ ہیں تو ان) کا حق ہے، جو کہ اس کے بالغ بیٹے کو گواہوں کی موجودگی میں حوالہ کردی جائے، تاکہ بعد میں اس رقم کے متعلق نزاع کی کوئی صورت نہ بنے، اور پھر بڑے بیٹے پر لازم ہوگا کہ وہ اس رقم کو والدہ مرحومہ کے ورثاء کے درمیان میراث کے شرعی حصوں کے مطابق تقسیم کردے۔
واضح رہے کہ عدت گزرنے کے بعد مرحومہ کے سابقہ شوہر کا اس کی میراث میں حصہ نہیں ہوتا، لہذا اگر عورت کا انتقال طلاق کی عدت گزر جانے کے بعد ہوا ہو تو مرحومہ کے سابقہ شوہر کا اس کی میراث میں حصہ نہیں ہوگا۔