سوال: میں ایک مسجد کا امام ہوں، مجھے ایک قسم کی نیند کی بیماری لاحق ہوگئی ہے جس سے مجھے اکثر نیند آتی ہے یہاں تک کے دورانِ نماز قیام میں اور اسی طرح تشہد میں بھی نیند آجاتی ہے، اگرچہ نیند مختصر سے ہوتی ہے، پھر میں اٹھ جاتا ہوں اور نماز مکمل کرتا ہوں، یہ نیند کی مقدار اتنی ہوتی ہے کہ پیچھے نمازیوں کو اس کا اندازہ بھی نہیں ہوتا، یہ بیماری اتنی زیادہ ہے کہ عام حالت میں بھی کبھی کھڑے کھڑے اور کبھی بائیک چلاتے ہوئے بھی ایک لحظہ تک نیند آجاتی ہے اور پھر جھٹکے سے اٹھ جاتا ہوں، اب پوچھنا یہ ہے کہ کیا اس صورت میں میری نماز اور امامت درست ہے یا نہیں؟ برائے مہربانی جتنا جلد ہوسکے جواب عنایت فرمائیں تاکہ کہی میری اور مقتدیوں کی نمازیں خراب نہ ہوجائے۔

جواب: واضح رہے کہ اگر نمازی (خواہ امام ہو یا مقتدی) دورانِ نماز قیام، رکوع یا سجدے کی حالت میں سوجائے تو اس سے اس کا وضو نہیں ٹوٹتا، جس سے اس کی نماز بھی فاسد نہیں ہوتی ہے، لیکن اگر نمازی نے سجدہ عورتوں کی ہیئت پر زمین سے خوب لگ کر کیا اور اس دوران سو گیا تو اس صورت میں استرخاء مفاصل (اعضاء کے ڈھیلے ہونے) کی وجہ سے اس کا وضو ٹوٹ جائے گا اور نماز بھی فاسد ہو جائے گی، لہذا اس نماز کا اعادہ لازم ہوگا۔