سوال: مفتی صاحب! بچپن سے ایک حدیث سنتے آرہے ہیں کہ ہمیشہ معاملات کو دائیں ہاتھ سے شروع کریں، اگر کوئی چیز تقسیم کر رہے ہیں تو دائیں ہاتھ سے شروع کریں، چاہے وقت کا بادشاہ بائیں ہاتھ پر ہی کیوں نہ بیٹھا ہو پھر بھی دائیں ہاتھ سے شروع کریں۔ میں نے آج یہ بات کہیں کوٹ کی تو انہوں نے مجھ سے اس حدیث کی سند مانگ لی ہے تو کیا اس کی کوئی سند مل سکتی ہے؟

جواب: واضح رہے کہ ہر اچھے کام کو دائیں طرف سے شروع کرنا جناب نبی کریم صلی اللہ علیہ کی سنت اور پسندیدہ عمل ہے، جیسا کہ صحیح بخاری میں حضرت عائشہ رضی اللہ عنہا سے روایت ہے: "جناب نبی کریم صلی اللہ علیہ وسلم جوتا پہننے میں، کنگھی کرنے میں، پاکی حاصل کرنے میں حتیٰ کہ (ہر شرف اور زینت والے) کام میں دائیں جانب سے شروع کرنے کو پسند فرماتے تھے"۔ (صحیح بخاری، حدیث نمبر: 168)
اسی طرح کوئی چیز تقسیم کرتے وقت دائیں طرف سے شروع کرنا بھی پسندیدہ اور مسنون عمل ہے، جیسا کہ سنن أبی داؤد میں حضرت انس رضی اللہ عنہ سے روایت ہے: "ایک آدمی حضور صلی اللہ علیہ وسلم کی خدمت میں دودھ لے کر حاضر ہوا، اس وقت آپ علیہ الصلاۃ والسلام کے دائیں جانب ایک دیہاتی شخص بیٹھا ہوا تھا، جبکہ بائیں جانب حضرت صدیق اکبر رضی اللہ عنہ تشریف فرما تھے، آپ علیہ الصلاۃ والسلام نے اس دودھ میں سے کچھ پیا، اور جو باقی بچا، اسے آپ علیہ الصلاۃ والسلام نے دائیں طرف بیٹھے ہوئے دیہاتی شخص کو پہلے دیتے ہوئے فرمایا: " الْأَيْمَنُ فَالْأَيْمَنُ " یعنی جو شخص دائیں طرف بیٹھا ہو، پہلے اس کا حق ہے"۔ (سنن أبي داؤد، حدیث نمبر: 3726)
لہذا آپ علیہ الصلاۃ والسلام کے اتباع کی نیت سے ہر اچھے کام کو شروع کرتے وقت یا کوئی چیز تقسیم کرتے وقت دائیں جانب سے ابتداء کرنے کو اختیار کرنا چاہیے۔