سوال: السلام علیکم، مفتی صاحب! میرا آپ سے سوال یہ ہے کہ اکثر لوگ بارش نہ ہونے پر طرح طرح کے جملے کہہ دیتے ہیں۔ ہمارے آفس میں ایک ملازم ہے، انہوں نے کل بارش کی بوندا باندی ہونے پر (معاذ اللہ) یہ کہہ دیا کہ فرشتوں نے تھوکا ہے۔ کیا یہ کفریہ کلمات ہیں؟ کیا ان کو تجدید ایمان اور اللہ سے توبہ کرنی چاہیے؟ برائے مہربانی اس سوال کا جواب عنایت فرما دیجیے گا۔

جواب: سوال میں پوچھی گئی صورت میں اگر مذکورہ الفاظ فرشتوں کو حقیر سمجھتے ہوئے استخفاف اور استھزاء کے طور پر کہے گئے تھے تو اس صورت میں کہنے والا دائرہ اسلام سے خارج ہوگیا ہے، اس پر لازم ہے کہ توبہ و استغفار کرکے تجدید ایمان کرے، اور اگر مذکورہ الفاظ سے فرشتوں کے استخفاف اور استھزاء کی نیت نہیں تھی تو اس صورت میں کہنے والا دائرہ اسلام سے خارج نہیں ہوا ہے، البتہ اس قسم کے الفاظ کو زبان پر لانا چونکہ احتیاط کے خلاف ہے، اس لیے آئندہ اس قسم کے الفاظ کہنے سے مکمل طور پر اجتناب کرنا لازم ہے۔