سوال: مفتی صاحب! میں دبئی میں ملازمت کرتا ہوں اور یہاں دبئی اسلامک بینک سے لاکھ درہم تک قرض لیکر اپنا گھر اور کاروبار پر رقم لگانا چاہتا ہوں، مگر بینک یہ کہتا ہے کہ ٹوٹل رقم کے ساتھ چار پانچ سال کی آسان قسطوں کے ساتھ پانچ فیصد اضافی رقم جو کہ قسطوں میں سے ہی کاٹی جائے گی، چارج کی جائے گی تو اس صورت میں پانچ فیصد سود ہوگا یا جائز عمل ہے؟

جواب: واضح رہے قرض لیکر اس کے بدلے اضافی رقم واپس کرنے کا معاملہ کرنا سود ہے٬ جوکہ ناجائز اور حرام ہے٬ اس سے اجتناب لازم ہے۔
جہاں تک سوال میں ذکردہ بینک کا تعلق ہے، اگر وہ قرض کی بنیاد پر ہی رقم دے کر قسطوں میں اضافی رقم واپس لیتے ہیں تو یہ سود کی ایک صورت ہے، جس سے اجتناب لازم ہے، لیکن اگر مذکورہ بینک گھر یا کاروبار کیلئے مستند علماء کرام کی زیرنگرانی شرعی اصولوں کے مطابق کسی جائز طریقہ تمویل کے مطابق فائنانس کرتا ہو تو چونکہ ہمیں اس کی تفصیلات اور اس کا عملی طریقہ کار معلوم نہیں ہے کہ وہ بینک کس بنیاد پر یہ فائناسنگ (Financing) کر رہا ہے، اس لئے اس سلسلے میں ہم کوئی شرعی رائے نہیں دے سکتے٬ لہذا بہتر ہے کہ آپ اس سلسلے میں مذکورہ بینک کے شریعہ بورڈ کے علماء کرام سے رابطہ کرکے تفصیلات معلوم کرلیں۔