سوال: مفتیان کرام رہنمائی فرمائیں کہ کیا اپنی زمین کسی دوسرے شخص کو ایک فکس مقدار پر سالانہ ٹھیکہ پہ دینا سود اور حرام ہے؟
ایک شخص یہ کہے کہ زمین میری ہے تم کاشت کرو، خرچہ اور آمدن آدھا آدھا ہوگا تو کیا یہ بھی حرام اور سود کے زمرے میں آتا ہے؟

جواب: زمین کو متعین رقم کے بدلے ٹھیکہ پر دینا اور زمین کی پیداوار ساری کی ساری کاشتکار کی ہو، یہ صورت شریعت میں "اجارہ" کہلاتی ہے، اس طرح کا معاملہ کرنا درست ہے، شرعاً اس میں کوئی حرج نہیں ہے۔
زمین کو اس طرح ٹھیکہ پر دینا کہ کاشتکاری کے خرچہ میں زمین کا مالک اور کاشتکار دونوں برابر کے ذمہ دار اور شریک ہوں، یہ صورت شرعاً درست نہیں ہے، البتہ اس کے جائز متبادل کے طور پر درج ذیل تین صورتوں میں سے کوئی صورت اختیار کی جاسکتی ہے۔
1- زمین، بیچ اور کاشتکاری کے آلات/ خرچہ وغیرہ زمین کے مالک کی طرف سے ہوں، اور صرف محنت کاشتکار کی طرف سے ہو۔
2- زمین ایک کی ہو، بیچ اور کاشتکاری کے آلات و خرچہ دوسرے کی طرف سے ہو‍ں۔
3- زمین اور بیچ زمین کے مالک کی طرف سے ہوں، جبکہ محنت اور کاشتکاری کے آلات وغیرہ کاشتکار کی طرف سے ہوں۔