سوال: میں عدت میں ہوں، میرے بھائی کسی کام کے سلسلے میں نادرا گئے تھے، ہماری تاریخِ پیدائش چونکہ کچھ غلط لکھی گئی تھی، جس کی وجہ سے میرے اور بھائی کی پیدائش کے درمیان چار ماہ کا وقفہ بنتا ہے، شناختی کارڈ بناتے وقت دھیان نہیں رہا تھا، اس لیے نادرا والے اب انہیں شناختی کارڈ نہیں دے رہے، ہمارے شناختی کارڈ مانسہرہ سے بنے تھے اور میں لاہور میں عدت میں ہوں، نادرا والوں نے بھائی کا شناختی کارڈ رکھ لیا ہے کہ جب تک میں نا چلی جاؤں، وہ نہیں دیں گے، میری عدت پوری ہونے میں اکیس دن ہیں اور بھائی نے بیرون جانے کے لیے کچھ کاغذات جمع کروانے ہیں، جس کے لیے شناختی کارڈ جلدی چاہیے، وہ چاہ رہے ہیں کہ میں اس کام کے لیے مانسہرہ آجاؤں تو کیا میں عدت میں لاہور سے مانسہرہ سفر کرسکتی ہوں جب کہ سفر میں تو لازما رات باہر گزرے گی؟ برائے مہربانی رہنمائی فرما دیں۔ جزاک اللہ خیرا

جواب: بیوہ عورت کو عدت کے دوران شدید ضرورت (جیسے گھر گرنے یا عزت و آبرو کے لٹنے کا اندیشہ ہو یا اس جیسی کوئی اور ضرورت) کے بغیر سفر کرنا جائز نہیں ہے۔
لہٰذا ذکر کردہ مجبوری کی وجہ سے آپ کا لاہور سے مانسہرہ تک سفر کرنا جائز نہیں ہے، بھائی کو اپنا شرعی عذر بتلا کر اسے قائل کریں کہ عدت کے ختم ہونے تک اپنے کام کو موخر کردے، ان شاء اللہ! اللہ جل شانہ ان کے اور آپ کے حق میں بہتر کرے گا۔