سوال:
السلام علیکم، مفتی صاحب ! کیا عدت وفات صرف جوان خواتین پر لازم ہوتی ہے؟ یہاں اکثر بوڑھی خواتین 3 دن یا 40 دن عدت میں بیٹھ کر پھر یہ کہہ کر عدت ختم کر دیتی ہیں کہ عدت وفات صرف ان عورتوں پر ہے، جنہیں حیض آتا ہے، جسے حیض نہیں آتا یا بوڑھی ہیں ان پر عدت نہیں ہے، اِس بارے میں برائے مہربانی تھوڑی تفصیل سے سمجھا دیں۔
جواب: واضح رہے کہ قرآن کریم کی کسی آیت یا کسی حدیث میں یہ بات نہیں آئی کہ عدتِ وفات صرف ان عورتوں پر ہے جنہیں حیض آتا ہو، یہ محض من گھڑت (لوگوں کی بنائی ہوئی) بات ہے، بلکہ قرآن و حدیث سے یہ بات معلوم ہوتی ہے کہ عدتِ وفات ہر اس عورت پر لازم ہے، جس کا شوہر انتقال کر جائے، خواہ وہ جوان ہو یا بوڑھی، لہذا جو عورتیں حاملہ ہوں، چاہے وہ بوڑھی ہوں یا جوان، ان کی عدتِ وفات وضع حمل ہے، اور اگر حاملہ نہ ہوں تو ان کی عدت چار ماہ دس دن ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
القرآن الکریم: (الطّلاق، الآیۃ: 4)
وَاللَّائِي يَئِسْنَ مِنَ الْمَحِيضِ مِنْ نِسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ وَاللَّائِي لَمْ يَحِضْنَ ۚ وَأُولَاتُ الْأَحْمَالِ أَجَلُهُنَّ أَنْ يَضَعْنَ حَمْلَهُنَّ ۚ وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْرًاo
ترجمہ:
اور تمہاری عورتوں میں سے جو ماہواری آنے سے مایوس ہوچکی ہوں اگر تمہیں (ان کی عدت کے بارے میں) شک ہو تو (یاد رکھو کہ) ان کی عدت تین مہینے ہے، اور ان عورتوں کی (عدت) بھی (یہی ہے) جنہیں ابھی ماہواری آئی ہی نہیں، اور جو عورتیں حاملہ ہوں، ان کی (عدت کی) میعاد یہ ہے کہ وہ اپنے پیٹ کا بچہ جن لیں۔ اور جو کوئی اللہ سے ڈرے گا، اللہ اس کے کام میں آسانی پیدا کردے گا۔
واللہ تعالٰی اعلم بالصواب
دارالافتاء الاخلاص،کراچی