سوال: محترم مفتی صاحب! السلام علیکم ورحمتہ اللہْ وبرکاتہ، کیا عشاء سے پہلے چار رکعت سنت ثابت ہے؟ حدیث شریف میں اس کا ذکر ہے؟

جواب: عشاء سے قبل چار رکعت سنت غیر مؤکدہ کا ذکر صراحت کے ساتھ کسی مرفوع روایت میں نہیں آیا، البتہ بعض روایات میں عشاء سے قبل نوافل پڑھنے کا ذکر ملتا ہے۔

وہ روایات درج ذیل ہیں:
صحیح بخاری میں ہے:
"عَنْ عَبْدِ اللَّهِ بْنِ مُغَفَّلٍ المُزَنِيِّ: أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ: بَيْنَ كُلِّ أَذَانَيْنِ صَلاَةٌ، ثَلاَثًا لِمَنْ شَاءَ".
(صحیح البخاری: رقم ۶۲۴)
(وکذا فی صحیح المسلم: ۱/ ۲۷۸)
ترجمہ:
حضرت عبد اللہ بن مغفل رضی اللہ عنہ سے مروی ہے، نبی کریمﷺنے تین مرتبہ یہ اِرشاد فرمایا: ہر دو اذانوں(یعنی اذان و اِقامت)کے درمیان نماز ہے،جو پڑھنا چاہے۔
"عن سعيد بن جبير : كانوا يستحبون أربع ركعات قبل العشاء الآخرة".
(قیام اللیل لمحمد بن نصر الروزی: ۵۸)
ترجمہ:
حضرت سعید بن جبیر رحمہ اللہ تعالی فرماتے ہیں: پہلے بزرگ (یعنی صحابہ کرام رضی اللہ عنہم اجمعین و تابعین رحمہم اللہ) عشاء کی نماز سے قبل چار رکعت پڑھنے کو مستحب سمجھتے تھے۔
مذکورہ بالا روایات سے استدلال کرتے ہوئے فقہائے امت نے عشاء سے قبل چار رکعت کو سنت غیر مؤکدہ قرار دیا ہے۔