سوال: مفتی صاحب! وصیت کی اقسام بیان فرمادیں۔

جواب: واضح رہے کہ حکم کے اعتبار سے وصیت کے مختلف درجات ہیں جو درج ذیل ہیں:
1) واجب وصیت
بعض صورتوں میں وصیت کرنا واجب ہوتی ہے، جیسے: کسی کے ذمہ فرض نمازوں یا رمضان کے روزوں کی قضا باقی رہ گئی ہو تو ان کے فدیہ کی ادائیگی کی وصیت یا کسی کے ذمہ صدقہ فطر کی ادائیگی باقی ہے یا اس نے اپنے ذمہ واجب قربانی کا حکم ادا نہیں کیا یا قسم کھا کر توڑ دی اور اس کا کفارہ ادا نہیں کیا یا منت مانی تھی اور اسے پورا نہیں کیا یا اس کے پاس کسی کی کوئی چیز امانت رکھی ہوئی ہے اور اس نے واپس نہیں کی یا اس کے ذمہ کسی کا قرض ہے جو اس نے ابھی تک ادا نہیں کیا ہے تو ان تمام صورتوں میں وصیت کرنا واجب ہے، کیونکہ ان سب کی ادائیگی واجب ہے۔
2) مستحب وصیت
بعض دفعہ وصیت کرنا مستحب ہوتی ہے، جیسے :مسجد یا مدرسہ کی تعمیر میں ایک تہائی کے اندر مال لگانے کی وصیت کرنا یا کسی ہسپتال یا رفاہی ادارے میں مال دینے کی وصیت کرنا یا غرباء و مساکین، بیواؤں اور یتیموں پر صدقہ کرنے کی وصیت کرنا یا بورنگ، کنواں کھدوانے، پانی کا کولر یا موٹر لگانے کی وصیت کرنا یا قرآن مجید اور دینی کتابیں خرید کر انہیں مسجد یا مدرسہ کے لئے وقف کرنے کی وصیت کرنا وغیرہ۔
3) مباح وصیت
بعض دفعہ وصیت کرنامباح ہوتی ہے، جیسے: مالدار لوگوں کے لئے وصیت کرنا، چاہے وہ غیر وارث رشتہ دار ہوں یا اجنبی ہوں۔
4) مکروہ وصیت
بعض دفعہ وصیت کرنامکروہ ہوتی ہے، مثلا: ایسے لوگوں کے لئے وصیت کرنا، جو ظاہر میں اللہ تعالی کے نافرمان ہوں اور کھلم کھلاگناہ کے کاموں میں مبتلا ہوں اور غالب گمان یہ ہو کہ وہ لوگ اس وصیت کے پیسوں کو گناہ کے کاموں میں استعمال کریں گے، تاہم اگر کسی نے ایسے لوگوں کے لئے وصیت کردی تو اس وصیت پر عمل کیا جائے گا، البتہ وصیت کرنے والا گناہ گار ہوگا۔
5) ناجائز وصیت
بعض دفعہ جو وصیت کی جاتی ہے، وہ ناجائز ہوتی ہے، جیسے : ورثاء کو محروم کرنے کی غرض سے ایک تہائی مال سے زائد کی وصیت کرنا یا غیر مسلموں کا عبادت خانہ بنوانے یا اس کی مرمت کروانے کی وصیت کرنا یا کسی کو شراب خرید کر دینے کی وصیت کرنا یا پختہ قبر بنوانے کی وصیت کرنا یا سنگ مرمر کی قبر بنوانے کی وصیت کرنا یا مرنے کے بعدکسی گناہ وبدعت کے کام کی وصیت کرنا وغیرہ، یہ سب وصیتیں ناجائز ہیں، کیونکہ مذکورہ امور ناجائز ہیں اور ایسی وصیتوں کو پورا کرنا بھی ناجائز ہے۔