سوال:
ایک سوال پوچھنا ہے وہ یہ کہ میں ایک کار قسطوں پر خریدنا چاہرہا ہوں اور ایک کمپنی قسطوں پر گاڑیاں دیتی ہے، لیکن گاڑی ہم کسی بھی جگہ پر پسند کریں گے اور اس کمپنی کو بتائیں گے، وہ کمپنی وہاں جاکراس شوروم یا فرد سے گاڑی خریدے گی اور جتنے کی گاڑی خریدی گئی، اس پر متعین پرسنٹ ریٹ بڑھا کرہمیں قسطوں پر دیجائیگی، کیا اس طرح گاڑی خریدنا جائز ہے؟

جواب: صورتِ مسئولہ میں اگر وہ کمپنی آپ کو گاڑی خریدنے کا وکیل بناتی ہے اور آپ کمپنی کی طرف سے وکیل بن کر گاڑی پسند کرتے ہیں، پھر کمپنی اس گاڑی کو اپنے پیسوں سے خریدتی ہے اور اس پر قبضہ بھی کرتی ہے، قبضہ میں آنے کے بعد وہ کمپنی آپ کے ساتھ ازسرنو قسطوں پر فروخت کرنے کا معاہدہ کرتی ہے، تو یہ صورت جائز ہے، بشرطیکہ دوسری شرائط کو بھی ملحوظ خاطر رکھا جائے، مثلا قسط نہ دینے کی صورت میں جرمانہ وغیرہ نہ عائد کیا جائے۔