سوال: 1) متوفیٰ خاتون عرصہ تقریباً بیس سال سے اپنے شوہر سے لا تعلق رہی لیکن طلاق نہیں ہوئی،متوفیٰ خاتون کی اولاد نہیں تھی، شوہرنے دوسری شادی کی تھی، اس سے اولاد تھی، اب وراثت کی تقسیم کیسے ہوگی؟ جبکہ متوفیٰ خاتون کے شوہر، تین بھائی اور تین بہنیں حیات ہیں، کون کتنا حق دار ہے؟
2) متوفی خاتون نے اپنے پہنے ہوئے زیور، بالیوں اور کوکا کی وصیت متعین غسل دینے والی خواتین کے لئے کی تھی، غسل تو انہیں متعین خواتین نے ہی دیا لیکن ورثاء نے غالبًا لاعلمی کی وجہ سے وہ دوسرے ادارے میں دے دیا ہے تو اب اس کا کیا حکم ہے؟
3) متوفیٰ خاتون کی وصیت کے مطابق ساری رقم مسجد اور مدرسے کے کاموں میں لگانی تھی اور اپنی زندگی میں بار بار تاکید بھی کرتی رہی ہے کہ میرے فوت ہونے کے بعد سب کچھ مسجد مدرسے کا ہے تو کیا ان کی حکماً تاکید سے وہ مسجد مدرسے کا ہوگا یا ترکہ کی تقسیم پر ہوگا؟ براہ کرم تفصیل سے وضاحت فرمائیے۔

جواب: 1) واضح رہے کہ نکاح میں ہوتے ہوئے شوہر اور بیوی کو کسی بھی وجہ سے ایک دوسرے سے علیحدہ رہتے ہوئے خواہ کتنا ہی عرصہ گزر جائے، اس سے ان کے نکاح پر کوئی اثر نہیں پڑتا، ایسی صورت میں کسی ایک کے انتقال ہونے کی صورت میں دوسرا اس کی میراث میں حقدار ہوتا ہے، لہذا پوچھی گئی صورت میں چونکہ شوہر نے طلاق نہیں دی تھی اور مرحومہ کی کوئی اولاد بھی نہیں ہے، اس لیے مرحومہ کا شوہر اپنی بیوی کی میراث میں آدھے (1/2) حصے کا حقدار ہے، باقی آدھا حصہ مرحومہ کے تین بھائی اور تین بہنوں کے درمیان تقسیم ہوگا۔
مرحومہ کی کل جائیداد منقولہ اور غیر منقولہ کو اٹھارہ (18) حصوں میں تقسیم کیا جائے گا، جس میں سے شوہر کو نو (9) حصے، تینوں بھائیوں میں سے ہر ایک بھائی کو دو (2) اور تینوں بہنوں میں سے ہر ایک بہن کو ایک (1) حصہ ملے گا۔
فیصد کے اعتبار سے شوہر کو %50 فیصد حصہ، تینوں بھائیوں می سے ہر ایک کو %11.11 فیصد حصہ اور تینوں بہنوں میں سے ہر ایک بہن کو %5.55 فیصد حصہ ملے گا۔
2) قرآن شریف میں وصیت کرنے والے کی جائز وصیت کو تبدیل کرنے والے کے متعلق اللہ پاک کا ارشاد ہے:
جس کا ترجمہ ہے: "پھر جو شخص اس وصیت کو سننے کے بعد اس میں کوئی تبدیلی کرے گا تو اس کا گناہ ان لوگوں پر ہوگا جو اس میں تبدیلی کریں گے یقین رکھو کہ اللہ ( سب کچھ) سنتا جانتا ہے۔ (سورة البقرة، آیت نمبر:181)
اس آیت سے معلوم ہوا کہ جائز وصیت میں تبدیلی کرنا جائز نہیں ہے، لہذا مرحومہ کی ایک تہائی (1/3) حصہ تک جائز وصیت پر عمل کرنا ورثاء پر لازم تھا، ورثاء وصیت پر عمل نہ کرنے کی وجہ سے گناہ گار ہیں، ورثاء پر لازم ہے کہ مرحومہ کے پہنے ہوئے زیور، بالیاں اور کوکا یا ان کے موجود نہ ہونے کی صورت میں ان کی مالیت متعین کردہ عورت کو دیں، بشرطیکہ یہ سامان یا ان کی مالیت ایک تہائی (1/3) کے بقدر یا اس سے کم ہو۔
3) "میرے فوت ہونے کے بعد سب کچھ مسجد مدرسے کا ہے" وصیت ہے، اور وصیت ایک تہائی (1/3) تک نافذ ہوتی ہے، لہذا مرحومہ کی کل جائیداد میں سے ایک تہائی (1/3) تک مسجد اور مدرسہ میں دیا جائے گا، باقی دو تہائی (2/3) شرعی ورثاء میں ان کے حصوں کے مطابق تقسیم ہوگا۔