سوال: مفتی صاحب! اگر صاحب ترتیب کی فجر کی نماز رہ گئی اور ظہر یا جمعہ کی جماعت کا وقت ہے، اور اس نے جماعت سے نماز پڑھ کر فجر کی قضا کی، تو ظہر اور جمعہ کی نماز ہوگئی یا نماز لوٹانی پڑے گی؟

جواب: واضح رہے کہ صاحبِ ترتیب( جس کے ذمے چھ  یا اس سے زیادہ نمازیں بلوغ کے بعد سے باقی نہ ہوں ) کی وقتی فرض نمازیں قضاء نمازوں کو لوٹانے سے پہلے صحیح نہیں ہوتیں۔
لہذا مذکورہ صورت میں جس صاحبِ ترتیب شخص کی فجر کی نماز قضاء ہوئی تھی، اس کے ذمہ فجر کی نماز کی قضاء، جمعہ کی نماز سے پہلے لازم تھی، چنانچہ اگر اس نے یاد ہونے کے باوجود جمعہ کی نماز، فجر کی نماز لوٹانے سے پہلےپڑھی ہے، تو اس طرح کرنے کی وجہ سے جمعہ کی نمازصحیح نہیں ہوئی، لہذا اس پر فجر کی قضاء پڑھنے کے بعد ظہر کی نماز دوبارہ پڑھنا لازم ہے۔
لیکن اگر اس شخص نے فجر کی نماز لوٹانے سے پہلے جمعہ کی نماز بھولے سے پڑھی ہے، تو پھر اس صورت میں نمازصحیح ہوگئی ہے، اب اس کو دوبارہ پڑھنا لازم نہیں ہے۔