سوال: مفتی صاحب ! ایک شخص کمانے کے قابل ہے اور کام بھی کرسکتا ہے، لیکن پھر بھی نہیں کماتا اور لوگوں سے مانگتا ہے اور کہتا ہے کہ جب مانگ کر پیٹ بھررہا ہے تو کمانےکی کیا ضرورت ہے؟ تو ایسے شخص کو زکوة دینا یا ایسے شخص کا مانگنا درست ہے یا نہیں؟

جواب: جس آدمی کے پاس ایک دن کا کھانا ہو اور ستر ڈھانکنے کےلیے  کپڑا ہو، اس کے لیے لوگوں سے مانگنا جائز نہیں ہے، اسی طرح جو آدمی کمانے پر قادر ہو، اس  کے لیے بھی سوال کرنا جائز نہیں، البتہ اگر کسی آدمی پر فاقہ ہو یا واقعی کوئی سخت ضرورت پیش آگئی ہو، جس کی وجہ سے وہ انتہائی مجبوری کی بنا پر سوال کرے تو اس کی گنجائش ہے، لیکن مانگنے کو عادت اور پیشہ بنالینا بالکل بھی جائز نہیں ہے، حدیث شریف میں آتا ہے کہ جو شخص بلا ضرورت مانگتا ہے تو قیامت کے دن اس کا یہ مانگنا اس کے چہرے پر زخم بن کر ظاہر ہوگا۔ ایک روایت میں ہے کہ جو اپنا مال بڑھانے کے لیے سوال کرتاہے تو یہ جہنم کے انگارے جمع کررہا ہے، اب چاہے تو کم جمع کرے یا زیادہ۔
جن کے بارے میں علم ہو کہ یہ پیشہ ور بھکاری ہیں تو ایسے افراد کی حوصلہ شکنی کرنی چاہیے، البتہ اگر کسی نے بھیک دے دی تو وہ گناہ گار نہ ہوگا، لینے والا گناہ گار ہوگا، البتہ ایسے افراد کو زکوة یا صدقاتِ واجبہ نہیں دینا چاہیے۔