سوال: ایک استاد بچوں کو کسی پروگرام میں شرکت کے لیے لے گئے، بچے زیادہ تھے، دوپہر میں انھیں ہوٹل میں کھانا کھلایا اور یہ نیت کی کہ میں زکوۃ کے پیسوں سے انھیں کھلا رہا ہوں۔
سارے بچے بالغ اور غیر صاحب نصاب تھے۔ (گوکہ ان میں سے اکثر کے والد صاحبِ نصاب ہونگے)
ہوٹل میں جیسے کھانا کھایا جاتا ہے، ویسے ہی کھانا کھایا گیا، پھر استاذ نے سارے بچوں کے بل آن لائن ادا کردیے، بل آن لائن ادا کرنے میں کچھ روپے کیش بیک بھی ملے۔
ایک سوال یہ ہے کہ اس طرح کھلانے سےاور سیدھا ہوٹل والے کو بل ادا کرنے سے زکوۃ کی ادائیگی ہوئی یا نہیں؟ (کیونکہ میں نے سنا ہے دعوت کھلانے سے زکوۃ ادا نہیں ہوتی) دوسرا سوال یہ ہے کہ بقدر کیش بیک روپے کی زکوۃ ادا ہوئی یا نہیں ؟
مثلا ہزار روپے کا بل تھا، ادائیگی کے بعد سو روپے کیش بیک مل گئے تو ہزار روپے کی زکوۃ ادا ہوگی یا نو سو روپے کی؟ (کیونکہ کیش بیک انعام ہوتا ہے)
ہر ایک جزء کا تشفی بخش جواب عنایت فرما کر ممنون فرمائیں، نوازش ہوگی۔

جواب: واضح رہے کہ زکوٰۃ کی ادائیگی کی بنیادی شرط "تملیک" ہے، یعنی مستحق زکوٰۃ کو مال زکوٰۃ کا مالک بنا دیا جائے، اس طور پر کہ چاہے تو وہ مستحق اس کو خود استعمال کرے یا کسی اور کو دیدے، جبکہ سوال میں ذکر کردہ صورت میں تملیک (مالک بنانا) نہیں پائی جا رہی ہے، بلکہ وہ کھانا بچوں کے سامنے "اباحت" کے طور پر رکھا گیا ہے، یعنی جتنا وہ کھا لیں، وہ ان کا اور جو بچ گیا وہ اسے اپنے ساتھ نہیں لے جاسکتے، لہذا سوال میں ذکر کردہ صورت کے مطابق کھانا کھلانے سے زکوٰۃ ادا نہیں ہوتی۔
ہاں ! اگر بچوں کو کھانا اس طریقہ سے دیا جائے کہ وہ چاہیں تو اسے کھا لیں اور اگر چاہیں تو اس کو اپنے ساتھ بھی لے جاسکیں(مثلا: کسی پیکٹ، تھیلی یا شاپر وغیرہ میں کھانا فراہم کیا جائے)، تب تملیک پائی جائے گی اور زکوٰۃ ادا ہو جائے گی۔