سوال: میں نے ایک حدیث سنی ہے کہلا الہ الا اللہ وحدہ لا شریک لہ لہ الملک ولہ الحمد وھو علی کل شئ قدیر پڑھنے سے سارے گناہ مٹ جاتے ہیں۔ کیا یہ حدیث صحیح ہے؟

جواب: واضح رہے کہ مسئولہ حدیث تلاش کے باوجود حضرت ابو امامہ کی سند سے سنن ابی داؤد میں نہیں ملی ہے، البتہ اس مفہوم سے ملتی جلتی حدیث سنن ابی داؤد میں حضرت ابو ہریرۃ کی سند سے موجود ہے، جو کہ درج ذیل ہے۔
ابوذر رضی اللہ عنہ نے کہا: اللہ کے رسول! مال والے تو ثواب لے گئے، وہ نماز پڑھتے ہیں، جس طرح ہم پڑھتے ہیں، روزے رکھتے ہیں جس طرح ہم رکھتے ہیں، البتہ ان کے پاس ضرورت سے زیادہ مال ہے، جو وہ صدقہ کرتے ہیں اور ہمارے پاس مال نہیں ہے کہ ہم صدقہ کریں، رسول اللہ صلی اللہ علیہ وسلم نے فرمایا: ابوذر! کیا میں تمہیں ایسے کلمات نہ سکھاؤں جنہیں ادا کر کے تم ان لوگوں کے برابر پہنچ سکتے ہو، جو تم پر ( ثواب میں ) بازی لے گئے ہیں، اور جو ( ثواب میں ) تمہارے پیچھے ہیں تمہارے برابر نہیں ہو سکتے، سوائے اس شخص کے جو تمہارے جیسا عمل کرے ، انہوں نے کہا: ضرور، اے اللہ کے رسول! آپ صلی اللہ علیہ وسلم نے فرمایا: ہر نماز کے بعد تینتیس (33) بار "الله اكبر" تینتیس (33) بار "الحمدلله" تینتیس (33)بار "سبحان الله" کہا کرو، اور آخر میں "لا إله إلا الله وحده لا شريك له له الملك وله الحمد وهو على كل شيء قدير" پڑھا کرو (جو ایسا کرے گا ) اس کے تمام گناہ بخش دئیے جائیں گے اگرچہ وہ سمندر کے جھاگ کے برابر ہوں ۔