سوال: مفتی صاحب ! میت کو غسل دینا فرض ہے، واجب ہے یا سنت ہے؟

جواب: مردہ کو غسل دینا مسلمانوں پر فرض کفایہ ہے، اگر کوئی بھی نہیں دے گا، تو سب گناہگار ہوں گے، اگر کچھ لوگوں نے اس فریضہ کو انجام دیدیا، تو دوسرے لوگ اس ذمہ داری سے بری ہوجائیں گے۔
احادیث میں مردہ کو غسل دینے کی بڑی فضیلت آئی ہے، چنانچہ ایک حدیث میں آپ صلی اللہ علیہ وسلم نے فرمایا :
َ" عَنْ عَلِيٍّ قَالَ قَالَ رَسُولُ اللَّهِ صَلَّی اللَّهُ عَلَيْهِ وَسَلَّمَ : مَنْ غَسَّلَ مَيِّتًا وَکَفَّنَهُ، وَحَنَّطَهُ وَحَمَلَهُ، وَصَلَّی عَلَيْهِ ، وَلَمْ يُفْشِ عَلَيْهِ مَا رَأَی خَرَجَ مِنْ خَطِيئَتِهِ مِثْلَ يَوْمِ وَلَدَتْهُ أُمُّهُ".
ترجمہ:
حضرت علی کرم اللہ وجہہ سے روایت ہے کہ رسول اللہ ﷺ نے فرمایا: جو کسی میّت کو نہلائے، کفن پہنائے، خوشبو لگائے اور اس کو اٹھائے، نماز جنازہ پڑھے اور کوئی عیب وغیرہ دیکھے تو اس کو ظاہر نہ کرے، وہ اپنی خطاؤں سے ایسے پاک صاف ہو جاتا ہے، جیسے وہ اپنی پیدائش کے دن خطاؤں سے پاک صاف تھا۔