سوال: السلام علیکم ورحمة الله وبركاته،
مفتی صاحب ! سورج گرہن کیا ہوتا بے اور کیوں ہوتا ہے اور سورج گرہن ہو تو کیا کرنا چاہیے؟

جواب: واضح رہے کہ سورج گرہن اللہ تعالی کی نشانیوں میں سے ایک نشانی ہے، اور اس کی ظاہری حقیقت یہ ہے، جو علم فلکیات کے ماہرین بیان کرتے ہیں کہ جب چاند سورج اور زمین کے درمیان میں آجائے، تو اس وقت سورج گرہن ہوتا ہے۔
حضور صلی اللہ علیہ وآلہ وسلم کے اپنے بیٹے حضرت ابراہیم رضی اللہ عنہ کی وفات کے موقع پر جب سورج گرہن ہوا، تو کچھ لوگ یہ بات کرنے لگے کہ حضرت ابراہیم رضی اللہ عنہ کی وفات کی وجہ سے سورج گرہن ہوگیا، آپ صلی اللہ علیہ وآلہ وسلم نے جب لوگوں کی یہ بات سنی تو اس کی حقیقت کو یوں بیان فرمایا: بلاشبہ سورج اور چاند اللہ تعالی کی نشانیوں میں سے ایک نشانی ہے، کسی کی موت اور حیات کی وجہ سے گرہن نہیں ہوتے، لیکن اللہ تعالی اس کے ذریعے سے اپنے بندوں کو ڈراتا ہے۔
نیز سورج گرہن کے وقت درج ذیل باتوں کا اہتمام کرنا چاہیے۔
1)سورج گرہن کے وقت نوافل اور دعاؤں کا اہتمام کرنا چاہیے۔
2) اللہ تعالی سے اپنے گناہوں کی معافی مانگنا چاہیے۔
3) ذکر واذکار میں مشغول رہنا چاہیے۔
4) حسب استطاعت صدقہ دینا چاہیے۔
5) اللہ تعالی کی نافرمانی والے اعمال سے اس روز خاص طور پر بچنے کا اہتمام کرنا چاہیے۔