سوال: السلام علیکم، مفتی صاحب ! میں دس لاکھ کی ایک کار خریدنا چاہتا ہوں، لیکن میرے پاس مطلوبہ رقم موجود نہیں ہے۔ ایک پارٹی میری جگہ آٹھ لاکھ روپے دے کر کار خریدے گی، جسے میں سات سال میں سولہ ہزار ماہانہ کے حساب سے تقریبا گیارہ لاکھ پچاس ہزار روپے کی صورت میں قسطوں پر ادا کروں گا، اس دوران اگر کبھی قسط کی ادائیگی میں تاخیر ہو جائے، تو اس کا کوئی جرمانہ بھی نہیں ہوگا۔ کیا شرعا یہ معاملہ جائز ہے؟

جواب: سوال میں ذکر کردہ صورت کے مطابق معاملہ کرنا اس وقت جائز ہوگا، جب دوسری پارٹی پہلے اپنے لیے کار خریدے اور حسی طور پر اس پر قبضہ بھی کر لے، اس کی قیمت چاہے فروخت کی قیمت سے کم ہو، اس کے بعد آپ کو وہ کار باہمی رضامندی سے قسطوں میں زیادہ قیمت پر فروخت کردے، پھر آپ وہ قیمت ماہانہ اقساط کی بنیاد پر قسطوار ادا کرتے رہیں، تو ایسا کرنا جائز ہے، بشرطیکہ قسط لیٹ ہونے کی صورت میں جرمانہ نہ ہو، تو مذکورہ بالا طریقے سے معاملہ کرنا جائز ہے، اس میں سود نہیں ہے۔