سوال: السلام علیکم، مفتی صاحب ! قسطوں پر کسی چیز کا اس شرط پر بیچنا کہ اگر کسی مہینے قسط کی ادائیگی نہ ہو پائے، تو اس پر جرمانہ ادا کرنا پڑےگا، درست ہے؟ اور اس جرمانہ کی شرعی حیثیت کیا ہے؟

جواب: واضح رہے کہ قسطوں پر خریدی گئی چیز کی "قسط شارٹ" ہونے پر جرمانہ سود کے زمرے میں آتا ہے، اس شرط کے لگانے سے یہ معاملہ سودی بن جاتا ہے، لہذا اس سے اجتناب کرنا چاہیے۔
تاہم قسطوں پر کسی چیز کی خریدوفروخت چند شرائط کے ساتھ جائز ہے، جو کہ مندرجہ ذیل ہیں:
١- اس چیز کی مجموعی قیمت باہمی رضامندی سے طے کرلی جائے، چاہے یہ قیمت نقد کے مقابلے میں زیادہ ہی کیوں نہ ہو۔
٢- قیمت کی وصولی کے لیے ماہانہ قسط کی مقدار اور تاریخ ادائیگی آپس میں مقرر کرلی جائے ۔
٣- کسی قسط کی گاہک کی طرف سے وصولی میں تاخیر یا کم ادا کرنے کی صورت میں اصل قیمت میں بطور جرمانہ اضافہ کرنے کی شرط نہ لگائی گئی ہو ۔
ان شرائط کی پابندی کے ساتھ کسی بھی چیز کی قسطوں پر خریدوفروخت جائز ہے، ان میں سے کوئی شرط چھوٹ جائے تو یہ خریدوفروخت جائز نہیں ہوگی۔