سوال: السلام علیکم، مفتی صاحب ! آج کل گیس کی کمی کی وجہ سے حکومت نے سی این جی پمپ کو بند رکھنے کے احکامات دیئے ہوئے ہیں، لیکن پھر بھی کراچی میں کچھ پمپ والے زیادہ پیسے لے کر جاننے والوں کو چوری چھپے سی این جی فراہم کر دیتے ہیں، پمپ والوں کا اس طرح سی این جی فراہم کرنا اور اسی طرح زیادہ پیسے دے کر لوگوں کا اپنی گاڑیوں میں سی این جی ڈلوانا کیسا ہے؟ اور اس طرح سی این جی ڈلوا کر اگر کوئی شخص ٹیکسی یا رکشہ وغیرہ چلاتا ہے، تو اس کی آمدنی حلال ہوگی یا حرام؟

جواب: واضح رہے کہ اصولی طور پر ہر شخص کو یہ حق حاصل ہے کہ وہ اپنی مملوکہ چیز کو جس قدر قیمت پر چاہے فروخت کرے، لیکن اگر حکومت اپنی عوام کے مفاد کی خاطر کسی امر مباح پر پابندی عائد کردے، تو ملک کے باشندوں پر قانونا وشرعا اس حکم کی پاسداری کرنا لازم ہوتا ہے۔
اس تفصیل کے بعد مذکورہ سوال میں سی این جی والوں کا حکومتی فیصلہ کے خلاف قیمت بڑھا کر سی این جی فروخت کرنے کو "بلیک کرنا" کہا جاتا ہے، شرعا یہ صحیح نہیں ہے، تاہم اگر جھوٹ اور دھوکا نہ ہو، تو اس سے حاصل شدہ نفع اگرچہ حلال ہے، لیکن شریعت کی نظر میں اس طرح کے قانون کی خلاف ورزی کرنا پسندیدہ نہیں ہے، کیونکہ اس میں حکومت کے ساتھ عہد شکنی پائی جاتی ہے، اور اس طرح قانون کی خلاف ورزی کرنے سے اپنی عزت اور مال کو خطرے میں ڈالنا ہے، جو کسی طرح سے دانشمندی نہیں ہے، اس لیے اس سے بچنا چاہیے۔
نیز یہی حکم ان سی این جی پمپ سے رکشہ، ٹیکسی والوں کا بلیک میں مہنگی سی این جی بھروا کر اس سے نفع کمانے کا ہے۔