سوال: السلام علیکم، مفتی صاحب! میرا اور میری والدہ کا ملا کر مکمل زیور تقریبا دس تولہ سونا ہے، تو کیا اس پر زکوۃ واجب ہوگی؟ کیونکہ بعض لوگوں کا کہنا ہے کہ شادی سے پہلے لڑکی ماں باپ کی ذمہ داری ہوتی ہے، اس لئے زکوٰۃ بھی ماں بیٹی کے زیور کو ملا کر دی جائے گی، شریعت کا اس بارے میں کیا حکم ہے؟ جبکہ اپنے زیورات میں خود استعمال کرتی ہوں۔

جواب: واضح رہے کہ اگر آپ دونوں کا الگ الگ زیور ساڑھے سات تولے سے کم ہے، اور آپ دونوں کے پاس چاندی یا کچھ روپیہ پیسہ وغیرہ بھی نہیں رہتا، تو اس صورت میں دونوں میں سے کسی پر بھی زکوٰۃ واجب نہیں ہے، البتہ اگر زیور کے ساتھ ساتھ دونوں کے پاس یا کسی ایک کے پاس چاندی یا کچھ روپیہ پیسہ بھی رہتا ہے، اور زیور کی رقم چاندی اور روپے کے ساتھ ملا کر ساڑھے باون تولہ چاندی کی قیمت کو پہنچ جاتی ہے، تو اس صورت میں زکوۃ واجب ہوگی۔