سوال:
السلام علیکم، مفتی صاحب! حدیث میں کن چھ چیزوں کا ذکر آیا ہے کہ جن کی خرید و فروخت کرتے وقت یہ بات ضروری ہے کہ وہ برابر ہوں؟ اور ان کا ادھار معاملہ کرنا صحیح نہیں ہے؟
جواب: واضح رہے کہ جو چیزیں ماپ کر یا وزن کر کے فروخت کی جاتی ہیں، ان کا تبادلہ اگر ان کی جنس کے ساتھ کیا جائے، تو ضروری ہے کہ دونوں چیزیں مقدار میں برابر ہوں، اور یہ تبادلہ نقد کیا جائے، اس میں کمی بیشی اور ادھار دونوں ناجائز ہیں، حدیث میں وہ چھ چیزیں یہ ذکر ہیں:
"عن عبادۃ بن الصامتؓ قال: قال رسول اﷲ صلی اﷲ علیہ وسلم: الذہب بالذہب، والفضۃ بالفضۃ، والبر بالبر، والشعیر بالشعیر، والتمر بالتمر، والملح بالملح، مثلا بمثل، سواء بسواء، یدا بید، فإذا اختلفت ہذہ الأصناف فبیعوا کیف شئتم إذا کان یدا بید"
(مسلم شریف)
آپ صلی اللہ علیہ وسلم نے چھ چیزوں کا ذکر فرمایا، سونا، چاندی، گیہوں، جو، کھجور، نمک، اور فرمایا کہ جب سونا، سونے کے بدلے، چاندی،چاندی کے بدلے، گیہوں، گیہوں کے بدلے، جو، جو کے بدلے، کھجور، کھجور کے بدلے، نمک، نمک کے بدلے فروخت کیا جائے، تو برابر ہونا چاہیے، اور ایک ہاتھ لے اور دوسرے ہاتھ دے، کمی بیشی سود ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
صحیح مسلم: (باب الصرف، رقم الحدیث: 1587)
عن عبادۃ بن الصامتؓ قال: قال رسول اﷲ صلی اﷲ علیہ وسلم: الذہب بالذہب، والفضۃ بالفضۃ، والبر بالبر، والشعیر بالشعیر، والتمر بالتمر، والملح بالملح، مثلا بمثل، سواء بسواء، یدا بید، فإذا اختلفت ہذہ الأصناف فبیعوا کیف شئتم إذا کان یدا بید۔
واللہ تعالٰی اعلم بالصواب
دارالافتاء الاخلاص،کراچی