سوال: انگلش میں قرآن شریف کی آیتیں لکھنا درست ہے یا نہیں؟اسی طرح ان شاءاللہ، جزاک اللہ وغیرہ لکھنے کا کیا حکم ہے؟

جواب: قرآن کریم کی طباعت عربی زبان کے علاوہ دیگر زبانوں مثلاً ہندی، اردو، انگریزی ،فرنچ وغیرہ میں کرنا یا لکھنا باجماعِ امت حرام وناجائز ہے اور مندرجہٴ ذیل وجوہات کی بنا پر تحریفِ قرآن کے حکم میں ہے۔
(۱) ایسا کرنا مصحفِ عثمانی کے رسم الخط کی تغییر وتبدیل ہے، جو باجماعِ امت حرام ہے،ط قال الإمام أحمد بن حنبل رحمہ اللہ: تحرم مخالفة خط مصحف عثمان في واو أو ألف أو یاء أو غیر ذلک (مناہل العرفان، المبحث العاشر في کتابة القرآن ورسمہ ومصاحفہ: ۱/۳۴۲ المکتبة العصریة، بیروت)
(۲) دوسری زبانوں میں بہت سے ایسے حروف موجود نہیں جو قرآن کریم میں پائے جاتے ہیں، مثلاً (ذ، ز، ض، ظ اور الف، ع) ان سب حروف کو مذکورہ زبانوں میں الگ الگ نقش اور تلفظ کے ساتھ ادا نہیں کیا جاتا، بلکہ ایک ہی نقش کے ساتھ ادا کیا جاتا ہے، حالانکہ ان حروف کے تلفظ کے بدلنے سے عربی میں معانی بدل جاتے ہیں اورایسا کرنا قرآن مجید کی کھلی تحریف ہے۔ إن مصطلح الخط والکتابة في عصرنا عرضة للتغییر والتبدیل ومن المبالغة في قداسة القرآن حمایتہ من التغییر والتبدیل في رسمہ (مناہل العرفان: ۱/۳۵۸، بیروت)
(۳) اگر دوسری زبان میں حرکات زیر، زبر وپیش کو بشکل حروف لکھا جائے تو یہ ایک اور تحریف ہے کہ قرآن کریم کے ہر کلمے میں حروف کی زیادتی ہوگی (حوالہ بالا)
(۴) نیز اس میں عجم کے کفار کے ساتھ مشابہت بھی ہے، کیونکہ یہ ان کا مخصوص رسم الخط ہے ۔
(۵) نیز اکثر زبانوں کی شروعات بائیں جانب سے ہوتی ہے، بنا بریں قرآن پاک کی شروعات بھی بائیں جانب سے ہوگی، جو کہ خلافِ سنت وخلافِ ادب ہے، کیونکہ دائیں جانب سے کام کی شروعات کرنا پسندیدہ اور مسنون ہے، حدیث پاک ہے:کان رسول اللہ صلی اللہ علیہ وسلم یحب التیمن ما استطاع في شأنہ کلہ في طہورہ وترجلہ وتنعلہ (مشکاة باب سنن الوضو ۴۶) انھیں وجوہات کی بنا پر قرآن مجید کو غیرعربی زبان میں لکھنا یا طباعت کرنا یا ایسے قرآن مجید کو پڑھنا شرعا ناجائز ہے، جو لوگ عربی زبان سے ناواقف ہیں، انھیں چاہیے کہ وہ عربی سیکھیں اور عربی ہی میں قرآن مجید کی تلاوت کریں، البتہ قرآن پاک کے عربی رسم الخط اور حروف کو باقی رکھتے ہوئے نیچے علاقائی زبان میں قرآن مجید کا ترجمہ شائع کرنے میں کوئی مضائقہ نہیں۔
واضح رہے کہ ان شاء الله، جزاک اللہ، السلام عليكم وغیرہ کا اگر انگلش زبان میں تلفظ صحیح ادا ہو، تو انگلش میں لکھنا جائز ہے، مگر بہتر یہی ھیکہ عربی میں لکھا جائے۔