سوال: السلام علیکم مفتی صاحب اگر کوئی شخص واقعی مستحق زکوۃ ہو، اور اس کو گھر کی تعمیر کیلئے رقم کی ضرورت ہو، تو ایک صاحب نصاب شخص اپنی زکوۃ کی رقم سے اس کے گھر کی تعمیر وغیرہ کروا دے، تو اس طرح اس کی زکوٰۃ ادا ہوجائے گی یا نہیں؟

جواب: واضح رہے کہ اگر زکوۃ کی رقم مستحق شخص کے ہاتھ میں دیے بغیر صاحب زکوۃ نے اس کے گھر کی تعمیر وغیرہ میں زکوٰۃ کی رقم خرچ کر دی، تو زکوۃ ادا نہیں ہوگی، لہذا گھر کی تعمیر سے پہلے زکوۃ کی رقم اس مستحق کے قبضہ میں دے کر مکمل طور پر مالک بنادیا جائے، پھر وہ اپنی مرضی سے اس رقم کو گھر کی تعمیر میں خرچ کر دے، تو اس صورت میں زکوۃ ادا ہو جائے گی۔