سوال: السلام علیکم، مفتی صاحب ! حنابلہ کے مطابق عصر کے وقت کے داخل یا اذان کے فورا بعد اگر کوئی حنفی شخص ظہر کی نماز ادا کرے، تو کیا بیس منٹ بعد وہ حنبلیوں کے ساتھ عصر کی جماعت میں شریک ہو سکتا ہے یا عصر کی نماز احناف کے مطابق وقت داخل ہونے کے بعد پڑھے گا؟

جواب: واضح رہے کہ کسی شخص کا اپنے مذہب پر عمل کرتے ہوئے کسی دوسرے مذہب کی ایسی چیزوں پر عمل کرنا جو اس کے اپنے مذہب میں ممنوع ہوں، ایسا کرنا (سوائے ضرورت شدیدہ کے، جس کا تعین علمائے کرام کا کام ہے) جائز نہیں ہے، کیونکہ ایسا کرنا تلفیق ہے، جوکہ بالاجماع باطل ہے، نیز کسی مسئلہ میں دوسرے امام کے مذہب پر عمل کرنے کے لئے یہ ضروری ہے کہ اس مسئلہ میں اس امام کے نزدیک جو شرائط ہیں، ان سب کی رعایت کی جائے، صورت مسئولہ میں مثل ثانی میں ظہر اور عصر دونوں کو ادا کرنے میں ظہر اور عصر کے وقت کی نہ احناف کے مذہب کے مطابق مکمل شرائط پائی جاتی ہیں، نہ حنابلہ کے مذہب کی، لہذا اگر ضرورت یا حرج کی وجہ سے مثل ثانی میں عصر پڑھ لی جائے، تو ظہر مثل ثانی میں نہیں پڑھی جائے گی۔