سوال: السلام علیکم، مفتی صاحب ! میری عمر اکیس سال ہے اور میں یونیورسٹی میں پڑھتا ہوں۔ آج کل میں سخت جنسی ہیجان میں مبتلا ہوں، اور ڈر ہے کہ اگر میں نے نکاح نہ کیا، تو جذبات کے ہاتھوں مغلوب ہو کر کہیں غلط راہ پر نہ چل پڑوں۔ یونیورسٹی میں ایک لڑکی سے میری دوستی ہو گئی ہے اور ہم دونوں شادی کرنا چاہتے ہیں، لیکن ہم دونوں کے والدین اس شادی کے لیے تیار نہیں، ان کا کہنا ہے کہ لڑکا پہلے پڑھائی مکمل کرے اور کچھ کمانے لگے، پھر شادی ہوگی۔ سو ہم نے والدین کی اجازت کے بغیر شادی کرنے کا ارادہ کر لیا ہے۔ سوال یہ ہے کہ کیا ہمارے لیے ایسا کرنا جائز ہے؟ خاص طور پر جب نکاح نہ کرنے کی صورت میں گناہ میں ملوث ہونے کا قوی امکان ہو۔ براہ کرم جلد از جلد جواب عنایت فرمائیں، میں انتہائی ذہنی اذیت میں مبتلا ہوں۔

جواب: واضح رہے کہ شریعت نکاح سے قبل لڑکا اور لڑکی کے آپس میں ملنے جلنے کی اجازت نہیں دیتی، اس سے بچنا ضروری ہے۔
اگر عاقل بالغ لڑکا اور لڑکی والدین کو لاعلم رکھ کر شرعی گواہوں کی موجودگی میں نکاح کریں، تو نکاح منعقد ہو جائے گا، بشرطیکہ وہ دونوں (لڑکا، لڑکی) خاندان، نسب، مال اور دین کے اعتبار سے ایک دوسرے کا کفو (برابر) ہوں، لیکن اگر لڑکا اور لڑکی خاندان، نسب، مال اور دین کے اعتبار سے ایک دوسرے کا کفو (برابر) نہ ہوں، تو یہ نکاح منعقد ہی نہیں ہوگا، اسی وجہ سے اسلام نے خصوصا لڑکی کی حیا اور پاکدامنی کا خیال رکھتے ہوئے نکاح کا اہتمام ولی (والدین ) کے سپرد کیا ہے،
لہذا لڑکی اور لڑکے کو والدین کی اجازت کے بغیر ہرگز کوئی ایسا اقدام نہیں کرنا چاہیے، جسے معاشرتی اور اخلاقی طور پر برا سمجھا جاتا ہو۔
تاہم نکاح کا مقصد دو خاندانوں کے درمیان محبت و الفت کا تعلق قائم کرنا ہے،لیکن اس طرح کا اقدام باہمی منافرت اور ناچاقیوں کا سبب بن سکتا ہے، اسلئے اس سے اجتناب کرنا چاہیے۔
نیز رسول اللہ صلی اللہ علیہ وسلم نے نکاح پر قدرت نہ ہونے کی صورت میں نفسانی خواہشات اور سفلی جذبات کو کمزور کرنے کے لیے روزے کا عمل تجویز فرمایا ہے، چنانچہ آپ صلی اللہ علیہ وسلم کا ارشاد ہے کہ: جو نکاح پر قدرت نہیں رکھتا اس کے لیے ضروری ہے کہ روزہ رکھے، کیونکہ روزہ (شہوتوں کے آگے) ڈھال ہے۔
اسی کے ساتھ ساتھ بری صحبت اور گناہ پر ابھارنے والے آلات سے دور رہنا بھی ضروری ہے۔